O‘zbekiston Respublikasi Ma’muriy javobgarlik to‘g‘risidagi kodeksining 147-moddasi (Yo‘llarga, yo‘l inshootlariga, yo‘l harakatini tartibga solib turuvchi texnik vositalarga shikast yetkazish, ularni saqlash qoidalarini buzish) birinchi qismiga o‘zgartirish kiritildi. Bu haqda Norma xabar berdi.
Qayd etilishicha, hozirgi vaqtda mazkur moddada yo‘llarga, yo‘l inshootlariga va yo‘l harakatini tartibga solib turuvchi texnik vositalarga shikast yetkazganlik, ularni saqlash qoidalarini buzganlik uchun sanksiyalar nazarda tutilgan.
O‘zgartirishlar kuchga kirgandan keyin, u bo‘yicha quyidagilarga ham jarima solish boshlanadi:
- avtomobil yo‘llarini o‘zboshimchalik bilan qaziganlik uchun;
- yo‘llarda sun’iy notesliklar va to‘siqlar barpo etganlik uchun;
- avtomobil yo‘lida ishlarni amalga oshirish uchun berilgan ruxsatnoma talablarini bajarmaganlik uchun;
- yo‘llarni saqlash qoidalarini buzganlik uchun.
Yuqorida keltirilgan huquqbuzarliklardan hech bo‘lmaganda bittasi aniqlangan taqdirda Transport vazirligi huzuridagi Yo‘l-qurilish ishlari sifatini nazorat qilish inspeksiyasi xodimlari bayonnoma tuzadi. Ma’muriy javobgarlik to‘g‘risidagi kodeksning 282-moddasi (Ma’muriy huquqbuzarlik to‘g‘risidagi bayonnomani jo‘natish) tartibida u ko‘rib chiqish uchun ma’muriy sudga yuboriladi.
Mazkur o‘zgarishlar 2020-yil 24-apreldan kuchga kiradi.
Izoh (0)