Ўтган 2019 йилда адлия органларига 100 мингдан ортиқ мурожаат келиб тушган бўлиб, бу 2018 йилги кўрсаткичдан қарийб икки баробар кўпдир. Уларнинг 86 мингдан зиёди ҳал қилинди, қарийб 57 минг нафар фуқароларнинг ҳуқуқлари тикланди.
3 февраль куни адлия вазири Русланбек Давлетов иштирокида ОАВ вакиллари учун ўтказилган медиа тадбирда таъкидланишича, ўтган йили ўзбошимчалик билан қурилган уй-жойга нисбатан эгалик ҳуқуқини эътироф этиш бўйича ўтказилган бир марталик акция доирасида 400 мингдан зиёд кадастр ҳужжати расмийлаштирилган. Яъни, 400 мингдан ортиқ оила ўз уй-жойига нисбатан ҳуқуқий кафолатни қўлга киритди. Икки ой давомида махсус акция доирасида икки мингдан кўпроқ мурожаат келиб тушган. Судларга 360 та ариза юборилиб, 30 миллиард сўм миқдорида компенсация талаб қилинган. 50 нафар мансабдор шахс жавобгарликка тортилган.
«Дарё» мухбирининг хабар беришича, адлия вазири Русланбек Давлетов ўз нутқида қоғозбозликни камайтириш масалаларига ҳам алоҳида тўхталиб ўтган.
«Маҳаллалар томонидан бериладиган маълумотнома жуда катта муаммо бўлиб келган. Биргина маҳалладан 28 та маълумотнома берилар экан. Бир йилда 40 миллионта маълумотнома берилганлиги ойдинлашди. Ўйлаб кўринглар, бюрократия шунча одамнинг ҳаётига таъсир қилиб келган, ҳаммаси бекор бўлди. ‘Маҳалладан маълумотнома олиб кел’, деб талаб қилиш мумкин эмас. Битта нарсага эътибор беринглар, маҳалла ҳеч қачон ўзи берган маълумотномага жавоб бермаган. Қанақадир тизим шаклланиб, биз бюрократияни ичига кириб кетгандик. Секин-секин бундан чиқиш йўлларини ўйлаяпмиз. Руҳий касалликлар ҳамда наркология диспансердан йилига 500 мингта маълумотнома берилар экан.
Масалан, сиз Мўйноқда яшасангиз, Тахиатошдаги диспансерга келиб, маълумотномани олишингиз керак. Пул тўлашингиз лозим, қанча миқдорда пул тўлайсиз, уни ҳеч ким ёзмаган. Бу ерда оворагарчиликлар кўп. Ҳукумат бизни қўллаб-қувватлади. Шу йилнинг 1 март санасидан мазкур маълумотнома Давлат хизматлари маркази орқали бериладиган бўляпти. Олдин 14 та жойдан берилган бўлса, энди 200 та тумандан берилади. Ҳар ким ўз туманидан маълумотномасини олиши мумкин.
Иккинчи таҳлилимиз, нега бундай маълумотномалар сўраляпти, деган масалани ҳам олдимизга қўйяпмиз. Нимага ҳамма ташкилотга борсангиз, ўнта ҳужжат, расм ва маълумотнома сўрайди. Нега расмни ички ишлар тизими, интеграция орқали ўзи олмайди? Ҳамма расмга тушиб юриши керак. Бу нарсалар халқ учун жуда қулай бўлиши, қийинчиликлар яратмаслиги керак», — деди Давлетов.
Вазирнинг қўшимча қилишича, вазирликка охирги икки йилда ҳуқуқий экспертизадан ўтказиш учун келиб тушган беш мингдан ортиқ лойиҳанинг 10 фоизи (527 та) қонунчилик талабларига жавоб бермаслиги сабабли қайтарилган. Давлат бошқаруви тизимининг самарадорлигини таҳлил қилиш соҳасини такомиллаштириш юзасидан жами 92 та таклиф ишлаб чиқилган.
Изоҳ (0)