O‘zbekistonliklar 2020-yilning 2-fevalidan boshlab Shengen vizasini olish uchun avvalgidek 60 yevro emas, balki 80 yevro to‘lov qiladi, deb xabar bermoqda Spot.
Bu Shengen vizasi uchun murojaat qilgan barcha shaxslarga 2020-yil fevral oyining birinchi kunidan boshlab qo‘llaniladigan yangi Shengen vizasi kodeksi bilan tasdiqlandi.
Bola uchun viza olishda ham hozirgidek 35 yevro o‘rniga 40 yevro to‘lanadi. Olti yoshgacha bo‘lgan bolalar esa avvalgidek viza to‘lovlaridan ozod etiladi.
Viza olish tartibini osonlashtirish uchun yangilangan Shengen vizasi kodeksi a’zo davlatlardan iloji boricha ushbu arizalarni elektron shaklda to‘ldirishni va topshirishni tavsiya qilmoqda.
Shuningdek, murojaatchilarga arizalarni tegishli a’zo davlat tomonidan tan olingan elektron imzo bilan imzolashga ruxsat beradi.
Yana bir afzalligi — Shengen vizasi uchun arizani rejalashtirilgan safar kunidan ko‘pi bilan 6 oy avval topshirish mumkin. Avval bu muddat 3 oyni tashkil qilgan. Biroq ariza topshirishning eng qisqa muddati hali ham 15 kunni tashkil etadi.
Besh yilgacha amal qiladigan ko‘p martalik vizalar Shengen hududiga tez-tez tashrif buyuradigan va ijobiy viza tarixiga ega bo‘lgan (ya’ni o‘zlarining avvalgi vizalaridan qonuniy foydalangan) sayohatchilarga beriladi.
Izoh (0)