Toshkent viloyati Ohangaron tumanlararo iqtisodiy sudi 24-yanvar, juma kuni Angren prokuraturasining “Yangiobod” sayyohlik bazasini majburiy baholashni amalga oshirish to‘g‘risidagi da’vosini qanoatlantirdi. Bu haqda sayyohlik bazasi egasi Ali To‘xtayevning so‘zlariga asoslanib, “Gazeta.uz” xabar berdi.
2019-yil yanvar oyida Toshkent viloyati hokimligi “jamoat va davlat ehtiyojlari uchun” sayyohlik bazasini musodara qilmoqchi ekanligi ma’lum bo‘ldi.
Mart oyida sayyohlik bazasi egasi viloyat ma’muriyatining qarori ustidan sudga shikoyat qilishga urinib ko‘rdi, ammo Nurafshon shahar ma’muriy sudi hokimning qarorini bekor qilishni rad etdi.
Aprel oyida Toshkent viloyati ma’muriy sudining apellyatsiya instansiyasi sudlov hay’ati hokimlikning sayyohlik bazasi bo‘yicha hukumatning “maxfiy” buyrug‘ini sudga taqdim etishdan bosh tortganiga qaramay, qarorni o‘zgarishsiz qoldirdi.
2020-yilning yanvar oyi boshida Angren prokuraturasi sudga murojaat qilib, da’vo arizasida sayyohlik bazasidan o‘z hisobidan 10 gektar yer uchastkasi va u yerda joylashgan bino va inshootlarni baholashni amalga oshirish va tadbirkor mol-mulkini viloyat hokimligi balansiga o‘tkazish uchun baholash natijalarini hokimlikka taqdim etishni so‘ragan.
Sud qaroriga munosabat bildirar ekan tadbirkor hukumat bir tomondan turizmni rivojlantirishni talab qilayotgani, boshqa tomondan esa tadbirkorga tegishli mol-mulkni davlat ehtiyojlari uchun olib qo‘yilayotganini aytgan. U o‘z fikrini Vazirlar Mahkamasining Toshkent viloyatida “Oltin halqa” turistik zonasini tashkil etish to‘g‘risidagi yangi qarori bilan izohlaydi. Ushbu qarorda Angren tumani ham tilga olinadi.
“Biz sudda hokimiyatning talabi noqonuniy ekanligini tushuntirdik. Shuningdek, 1-yanvardan boshlab yerlarni davlat foydasiga musodara qilish tartibi o‘zgarganini aytdik. Vazirlar Mahkamasining Toshkent viloyatida “Oltin halqa” turistik zonasini tashkil etish to‘g‘risidagi yangi qarori chiqdi, u yerga Angren tumani ham kiritilgan. Bizdan turizmni rivojlantirishimizni talab qilishmoqda. Shunday ekan, nima uchun hokimimiz va Angren prokuraturasi Prezident ko‘rsatmalariga zid ish tutmoqda?”, — deydi tadbirkor.
Uning so‘zlariga ko‘ra, navbatdagi sud majlisida Toshkent viloyati hokimligi sayyohlik bazasini musodara qilish to‘g‘risidagi Vazirlar Mahkamasi farmoyishi ko‘rsatilmagan.
“Bizga bu hujjatni hech kim ko‘rsatmadi. Chunki agar ko‘rsatishsa, hammasi chippakka chiqadi. Maxfiy topshiriq yo‘q. Uni hech kim ko‘rmagan. Sudda biz ‘O‘zingiz maxfiy topshiriqni ko‘rdingizmi?’, deb savol berdik. ‘Yo‘q’ deb javob berishdi. Hozir esa Angren hokimligi va prokuraturasi bizni mol-mulkni baholatish va uni hokimlikka sotishga majburlamoqda”, — deydi tadbirkor.
Sayyohlik bazasi huquqshunosi Azimjon Rahmatovning ma’lum qilishicha, hokimlik sudga 2019-yil 15-yanvarda Ali To‘xtayev bilan yer uchastkasini davlat hisobiga o‘tkazish yuzasidan uchrashgani to‘g‘risidagi bayonnomani taqdim etgan.
“Aslida esa Ali To‘xtayev ushbu majlisda ishtirok etmagan, lekin uni ishtirokchi sifatida qayd etishgan”, — deydi u.
Huquqshunosning ta’kidlashicha, yer uchastkasini musodara qilish to‘g‘risidagi Angren hokimiyatining 2019-yil 31-yanvardagi qarori ham sayyohlik bazasi egasiga yo‘naltirilmagan.
“Prokuratura mol-mulkni baholab, uning natijalarini hokimlikka topshirish majburiyatini yukladi. Bundan tashqari, sayyohlik bazasi egasi hisobidan baholashni amalga oshirish va Angren hokimligiga mol-mulkni o‘tkazish bo‘yicha qo‘shimcha da’vo talablari e’lon qilindi. Barcha talablar sud tomonidan ma’qullandi”, — dedi sayyohlik bazasi vakili.
Azimjon Rahmatov, shuningdek, sud Oliy sudga nazorat shikoyati berilganiga qaramasdan (sayyohlik bazasi apellyatsiya shikoyati rad etilgandan keyin) sud jarayonini kechiktirishga ruxsat bermaganligini ma’lum qildi.
“Oliy sud ishni ikki oy davomida ko‘rib chiqadi va sudya nazorat protestini e’lon qilishi yoki rad etishi yuzasidan qaror qabul qiladi. Shikoyatni ko‘rib chiqish muddati hali tugamadi”, — deydi huquqshunos.
“Yangiobod. Chotqol marvaridi” sayyohlik bazasi egasi Ali To‘xtayev Ohangaron tumanlararo iqtisodiy sudi qarori ustidan shikoyat qilishni rejalashtirmoqda.
Izoh (0)