Facebook’dagi guruhlardan birida Eduard Germanovich taxallusi ostidagi foydalanuvchi IIB xodimi uning xotinini urib, telefonini olib qo‘ygani haqida xabar qoldirgan. Toshkent shahar IIBB ushbu holat yuzasidan izoh taqdim etdi.
Qayd etilishicha, 7-yanvardan 8-yanvarga o‘tar kechasi soat taxminan 1:10 da “102” raqamiga Mirobod tumani Qo‘yliq mavzesida yashovchi 31 yoshli R.M. dan murojaat tushgan.
Fuqaro o‘z murojaatida yarim tunda spirtli ichimlik ta’sirida baland ovozda musiqa tinglayotgan qo‘shnilariga nisbatan chora ko‘rishni so‘ragan. Fuqaro murojaatini o‘rganish maqsadida voqea joyiga 4-sonli IIB profilaktika inspektori katta leytenant D. Tasjurekov yetib borgan.
Ko‘rsatilgan manzildagi eshikni spirtli ichimlik ta’sirida bo‘lgan Eduard R. va Valeriya Ye. ochgan.
Profilaktika inspektori ularga qo‘shnilardan shikoyat tushgani haqida ma’lumot bergan. Biroq er-xotin bugun bayram ekanligini hamda ular o‘z uylarida bayram qilish huquqiga ega ekanliklarini aytib, IIB xodimining qonuniy talabiga bo‘ysunishdan bosh tortgan.
Shundan so‘ng Valeriya Ye. holatni telefoniga videoga ola boshlaydi. Inspektor undan videoga olishni to‘xtatishni so‘rab, uning yuziga juda yaqin turgan smartfonni uzoqlashtirishga urinadi va ayolni itaradi. Ushbu holatdan jahli chiqqan Valeriya Ye. inspektorning formasiga yopishtirilgan ratsiyani yulib olib, u bilan IIB xodimining boshiga ikki marta uradi. (Profilaktika inspektoriga tan jarohati yetkazilgani haqidagi tibbiy ma’lumotnoma mavjud). Profilaktika inspektori fuqarolardan IIBga borishni so‘raydi. Lekin Valeriya Ye. xonaga kirib, ichidan qulflab oladi. Eduard R. guvohlar ishtirokida qo‘lga olingan. Shuningdek, guvohlar ishtirokida er-xotinga tegishli smartfonlar olib qo‘yilgan.
8-yanvar kuni ertalab soat 8:02 da Valeriya Ye. “102”ga qo‘ng‘iroq qilib profilaktika inspektori uni urib, telefonini olib qo‘yganini aytib, shikoyat qilgan.
Hozirda ayolning qayerda ekanligi noma’lum.
Ushbu holat bo‘yicha to‘plangan hujjatlar voqeaning barcha ishtirokchilari harakatlariga qonuniy baho berish uchun Mirobod tumani prokuraturasiga yuborilgan.
Izoh (0)