Facebook’даги гуруҳлардан бирида Эдуард Германович тахаллуси остидаги фойдаланувчи ИИБ ходими унинг хотинини уриб, телефонини олиб қўйгани ҳақида хабар қолдирган. Тошкент шаҳар ИИББ ушбу ҳолат юзасидан изоҳ тақдим этди.
Қайд этилишича, 7 январдан 8 январга ўтар кечаси соат тахминан 1:10 да «102» рақамига Миробод тумани Қўйлиқ мавзесида яшовчи 31 ёшли Р.М. дан мурожаат тушган.
Фуқаро ўз мурожаатида ярим тунда спиртли ичимлик таъсирида баланд овозда мусиқа тинглаётган қўшниларига нисбатан чора кўришни сўраган. Фуқаро мурожаатини ўрганиш мақсадида воқеа жойига 4-сонли ИИБ профилактика инспектори катта лейтенант Д. Тасжуреков етиб борган.
Кўрсатилган манзилдаги эшикни спиртли ичимлик таъсирида бўлган Эдуард Р. ва Валерия Е. очган.
Профилактика инспектори уларга қўшнилардан шикоят тушгани ҳақида маълумот берган. Бироқ эр-хотин бугун байрам эканлигини ҳамда улар ўз уйларида байрам қилиш ҳуқуқига эга эканликларини айтиб, ИИБ ходимининг қонуний талабига бўйсунишдан бош тортган.
Шундан сўнг Валерия Е. ҳолатни телефонига видеога ола бошлайди. Инспектор ундан видеога олишни тўхтатишни сўраб, унинг юзига жуда яқин турган смартфонни узоқлаштиришга уринади ва аёлни итаради. Ушбу ҳолатдан жаҳли чиққан Валерия Е. инспекторнинг формасига ёпиштирилган рацияни юлиб олиб, у билан ИИБ ходимининг бошига икки марта уради. (Профилактика инспекторига тан жароҳати етказилгани ҳақидаги тиббий маълумотнома мавжуд). Профилактика инспектори фуқаролардан ИИБга боришни сўрайди. Лекин Валерия Е. хонага кириб, ичидан қулфлаб олади. Эдуард Р. гувоҳлар иштирокида қўлга олинган. Шунингдек, гувоҳлар иштирокида эр-хотинга тегишли смартфонлар олиб қўйилган.
8 январь куни эрталаб соат 8:02 да Валерия Е. «102»га қўнғироқ қилиб профилактика инспектори уни уриб, телефонини олиб қўйганини айтиб, шикоят қилган.
Ҳозирда аёлнинг қаерда эканлиги номаълум.
Ушбу ҳолат бўйича тўпланган ҳужжатлар воқеанинг барча иштирокчилари ҳаракатларига қонуний баҳо бериш учун Миробод тумани прокуратурасига юборилган.
Изоҳ (0)