NATO ayni paytda Yaqin Sharqdagi rolini kuchaytirish imkoniyatini o‘rganib chiqayotgan bo‘lsa ham, mazkur mintaqada jangovar missiyalarni ko‘paytirishni rejalashtirmayapti. Bu haqda ittifoq bosh kotibi Yens Stoltenberg ma’lum qildi, deb yozmoqda “Kommersant”.
Avvalroq, Eron generali Qosim Sulaymoniyning o‘ldirilishi natijasida mintaqada vaziyat keskinlashgani sababli AQSh prezidenti Donald Tramp NATOdan Yaqin Sharqdagi jarayonlarda faol ishtirok etishni so‘ragan.
NATO bosh kotibining so‘zlariga ko‘ra, ayni paytda nima qilish mumkinligi o‘rganib chiqilmoqda, biroq jangovar missiyalarni kuchaytirish rejalashtirilmagan. Avvalroq NATO xavfsizlik maqsadlarida Iroqdan o‘z xodimlarining bir qismi chiqarilishi haqida ma’lum qilgan edi.
Eronning eng nufuzli generali Qosim Sulaymoniy 3-yanvar kuni Trampning buyrug‘iga ko‘ra o‘ldirilgan. AQSh prezidenti Sulaymoniyni terrorchi deb atagan, Eron generalning o‘limi uchun o‘ch olishga va’da bergan. 8-yanvarga o‘tar kechasi Eron AQShning Iroqdagi harbiy bazalariga raketa zarbalari bergan. Shuningdek, Eron yadro kelishuvidan to‘liq chiqqanini ma’lum qilgan hamda AQSh armiyasi va Pentagonni terrorchilik tashkilotlari deb e’lon qilgan.
Izoh (0)