НАТО айни пайтда Яқин Шарқдаги ролини кучайтириш имкониятини ўрганиб чиқаётган бўлса ҳам, мазкур минтақада жанговар миссияларни кўпайтиришни режалаштирмаяпти. Бу ҳақда иттифоқ бош котиби Йенс Столтенберг маълум қилди, деб ёзмоқда «Коммерсантъ».
Аввалроқ, Эрон генерали Қосим Сулаймонийнинг ўлдирилиши натижасида минтақада вазият кескинлашгани сабабли АҚШ президенти Дональд Трамп НАТОдан Яқин Шарқдаги жараёнларда фаол иштирок этишни сўраган.
НАТО бош котибининг сўзларига кўра, айни пайтда нима қилиш мумкинлиги ўрганиб чиқилмоқда, бироқ жанговар миссияларни кучайтириш режалаштирилмаган. Аввалроқ НАТО хавфсизлик мақсадларида Ироқдан ўз ходимларининг бир қисми чиқарилиши ҳақида маълум қилган эди.
Эроннинг энг нуфузли генерали Қосим Сулаймоний 3 январь куни Трампнинг буйруғига кўра ўлдирилган. АҚШ президенти Сулаймонийни террорчи деб атаган, Эрон генералнинг ўлими учун ўч олишга ваъда берган. 8 январга ўтар кечаси Эрон АҚШнинг Ироқдаги ҳарбий базаларига ракета зарбалари берган. Шунингдек, Эрон ядро келишувидан тўлиқ чиққанини маълум қилган ҳамда АҚШ армияси ва Пентагонни террорчилик ташкилотлари деб эълон қилган.
Изоҳ (0)