Sirdaryoda mast yo‘lovchi YPX xodimlarini urib, jarohat yetkazdi
20-yanvar, dushanba kuni Sirdaryo viloyati Sirdaryo shahrida tuman IIB YHXB YPXG katta inspektorlari E.Parmonov, S.Fayziyev hamda YPX xodimi F.Alimbayev mastlik holatini aniqlash bo‘yicha reyd olib borayotgan bo‘lgan, deb xabar beradi Ichki ishlar vazirligi Yo‘l harakati xavfsizligi Bosh boshqarmasi matbuot xizmati.
Qashqadaryo viloyati Mirishkor tumanida yashovchi Jamoliddin Hamroyev Nexia avtomobilini hujjatlarsiz boshqarib, YPX inspektorining to‘xtash ishorasiga bo‘ysunmasdan harakatni davom ettirgan.
Shundan so‘ng, YPX katta inspektori E.Parmonov YPX inspektorlari S.Fayziyev va F.Alimbayev bilan birgalikda Nexia avtomobilini kuzatib borishgan. Ular to‘xtash ishorasiga bo‘ysunmasdan harakatlangan transport vositasini Sirdaryo shahar “Yangi hayot” mahallasida to‘xtatib, haydovchidan hujjatlarni taqdim etishini so‘ragan.
Haydovchi J.Hamroyev boshqarish huquqini beruvchi hujjatlari yo‘qligini ma’lum qilgan vaqtida Nexia avtomobili yo‘lovchisi 1996-yilda tug‘ilgan Jahongir Panjiyev tizzasi bilan xizmat vazifasini bajarayotgan YPX inspektori E.Parmonovning qorin qismiga tepib, ko‘krak nishonini yulib olgan.
Shuningdek, YPX inspektori serjant S.Fayziyev fuqaro J.Panjiyevni tinchlantirmoqchi bo‘lgan vaqtida unga ham faol qarshilik ko‘rsatib, uning ham ko‘krak nishonini yulib olib, barmog‘ini qayirib sindirgan. YPX inspektorlari fuqarolar J.Panjiyev va J.Hamroyevning shaxsiga aniqlik kiritish va qonuniy chora ko‘rish maqsadida Sirdaryo tumani IIBga olib kelgan vaqtida fuqaro J.Panjiyev o‘zining huquqbuzarligini yana davom ettirib, F.Alimboyevning yuz qismiga bir marotaba kallasi bilan urib, tan jarohati yetkazgan.
Fuqaro J.Panjiyevni alkotestor ko‘rigidan o‘tkazilganda, mast ekanligi aniqlangan.
Hozirda bodikameralar xotiralari tekshirilib, Sirdaryo tuman prokuraturasi tomonidan tergovga qadar surishtiruv ishlari olib borilmoqda.
