Shavkat Mirziyoyev Tomskdagi yong‘in yuzasidan Hukumat komissiyasini tuzishga ko‘rsatma berdi

O‘zbekiston Prezidenti Shavkat Mirziyoyevning ko‘rsatmasiga asosan Rossiyaning Tomsk viloyatida yuz bergan yong‘inda halok bo‘lgan va jabrlangan fuqarolarning oila a’zolariga yordam ko‘rsatish maqsadida Hukumat komissiyasi tuzildi. Bu haqda Favqulodda vaziyatlar vazirligi matbuot xizmati xabar berdi.

Hukumat komissiyasiga quyidagi vazifalar yuklatildi:

• halok bo‘lgan fuqarolar va jabrlanganlarning yaqinlariga zarur tibbiy va psixologik yordam ko‘rsatish;
• jabrlangan va halok bo‘lgan O‘zbekiston fuqarolarining jasadini Vatanga olib kelish bo‘yicha tashkiliy choralarni ko‘rish;
• Rossiya mutaxassislari bilan hamkorlikda yong‘inni kelib chiqish sabablarini o‘rganish;
• mahalliy hokimiyat va o‘zini o‘zi boshqarish organlari bilan birgalikda vafot etgan fuqarolarning shaxsiga aniqlik kiritish va ularning oila a’zolariga dafn marosimlarini o‘tkazishda amaliy yordam ko‘rsatish.

Eslatib o‘tamiz, 21-yanvarga o‘tar kechasi Rossiyaning Tomsk viloyatida yog‘och kompaniyasida ishlovchi o‘zbekistonliklar istiqomat qiladigan yog‘ochli uyda yong‘in chiqdi. Yong‘in oqibatida 10 nafar o‘zbekistonlik vafot etib, 2 nafari jabrlandi. Shuningdek, bir nafar rus ayoli ham halok bo‘ldi.FVV hodisa oqibatida vafot etgan 9 nafar o‘zbekistonlikning shaxsi aniqlanganini ma’lum qildi. Ularning 8 nafari Navoiy viloyatining Qiziltepa tumanida, bir nafari Samarqand viloyatining Kattaqo‘rg‘on tumanidan. Yana bir qurbonning shaxsiga aniqlik kiritish ishlari olib borilmoqda.Rossiya Tergov qo‘mitasiga ko‘ra, qurbonlarning jasadlari qorayib, kuyib ketgan hamda tanib bo‘lmas darajaga kelgan.

“Ularning shaxsi genotipik ekspertiza yordamida aniqlanadi. Ya’ni halok bo‘lganlarning qarindoshlaridan qon namunasi olinadi va tana qoldiqlari namunalari bilan solishtiriladi”, — deyiladi Tergov qo‘mitasi xabarida