Oliy va o‘rta maxsus ta’lim vazirligi rahbariyati hamda oliy o‘quv yurtlari rektorlari ishtirokida 16-yanvar, payshanba kuni “Oliy ta’lim muassasalarining bosqichma-bosqich o‘zini o‘zi moliyalashtirishga o‘tish istiqbollari” mavzuida matbuot anjumani o‘tkazildi.
2020-yilning 1-yanvaridan mazkur yangi tizimda o‘z faoliyatini boshlagan OTMlar qatorida Toshkent davlat yuridik universiteti ham mavjud. “Daryo” muxbirining xabar berishicha, tadbirda ushbu oliygoh rektori Rahimjon Hakimov tizim afzalliklari va bu boradagi ayrim rejalariga to‘xtalib o‘tdi.
“O‘zini o‘zi moliyalashtirish tizimiga o‘tish tufayli OTMlarga moliyaviy nuqtai nazardan juda katta imkoniyat yaratilyapti. Shu o‘rinda eng muhim ikkitasini aytib o‘tmoqchiman. Birinchisi, iqtidorli, ijtimoiy himoyaga muhtoj talabalarga moddiy yordam berish imkoniyati tug‘ilyapti. Buni oliy ta’lim muassasining o‘zi OTM kengashi qarori bilan belgilaydi. Talabalar soni va mezonini ham mustaqil ishlab chiqadi.
Ikkinchi muhim imkoniyat shuki, bugungi bozor konyekturasidan kelib chiqib, yaxshi ishlayotgan, samarali mehnat qilayotgan xodimlar, professor-o‘qituvchilarning oylik ish haqlariga ustamalar belgilash huquqi berildi”, — dedi Toshkent davlat yuridik universiteti rektori Rahimjon Hakimov.
Rektorning so‘zlariga ko‘ra, o‘zini o‘zi moliyalashtirish tizimi faqatgina to‘lov-kontrakt miqdorini oshirish hisobidan o‘zini o‘zi qoplash degani emas. Turli startaplar, malaka oshirish va o‘quv kurslari, yozgi oromgohlar ham tashkil etib, OTMga qo‘shimcha pul tushirish imkoniyatlari tug‘ilyapti.
“Masalan, biz 30 dan ortiq chet ellik hamkorlarimiz bilan muzokaralar olib bordik. Shu yil yozda xorijlik talabalarga yozgi oromgoh tashkil qilmoqchimiz. Chet ellik yoshlarda katta qiziqish bor. 100 nafardan ortiq yigit-qizlarni jalb qilib, muayyan darajada ham pul ishlaymiz, ham investitsiya kiritiladi, ham O‘zbekistonning huquqiy madaniyatini xorijliklarga targ‘ib qilishga erishamiz.
Shuningdek, investorlar uchun alohida “O‘zbek huquqi” kurslarini yo‘lga qo‘ymoqchimiz. Qaysi korxonalarga qaysi yo‘nalishda huquqiy malaka oshirish kurslari kerak bo‘lsa, bu bo‘yicha ham yuridik xizmatlar tashkil etishni rejalashtiryapmiz”, — dedi Adliya vaziri o‘rinbosari, Toshkent davlat yuridik universiteti rektori Rahimjon Hakimov.
Izoh (0)