“Guliston ekstrakt-yog‘” AJning bir necha yildan buyon aksiyadorlarga dividend to‘lovlarini amalga oshirmagani o‘rganib chiqilmoqda. Bu haqda O‘zbekiston Kapital bozorini rivojlantirish agentligi ma’lum qildi.
Xabar berilishicha, Kapital bozorni rivojlantirish agentligiga “Guliston ekstrakt-yog‘” AJ aksiyadorlaridan murojaatlar kelib tushgan. Qayd etilishicha, aksiyadorlik jamiyati bir necha yildan buyon aksiyadorlarga dividend to‘lovlarini amalga oshirmagan. Agentlik tomonidan ushbu masalani o‘rganish davomida “Guliston ekstrakt-yog‘” AJning 2017—2018-yillarda bir nechta aksiyadorga umumiy qiymati 459 million so‘mlik dividendlarni o‘z vaqtida to‘lab bermagani aniqlandi.
Agentlik kompaniyaning minoritar aksiyadorlariga dividendlar va penya undirib berish masalasida sudga murojaat qilgan.
Guliston tumanlararo iqtisodiy sudi 2019-yil 26-dekabrda “Guliston ekstrakt-yog‘” AJdan jamoa aksiyadori U.J.ning foydasiga 86,7 million so‘m miqdorida dividend va 1,2 million so‘m miqdorida penya undirib berilishi bo‘yicha qaror chiqargan.
Hozirgi vaqtda sud kompaniyaning dividendlari o‘z vaqtida berilmagan boshqa aksiyadorlar bo‘yicha agentlik tomonidan berilgan boshqa da’vo arizalarini ko‘rib chiqmoqda.
Izoh (0)