Олий ва ўрта махсус таълим вазирлиги раҳбарияти ҳамда олий ўқув юртлари ректорлари иштирокида 16 январь, пайшанба куни «Олий таълим муассасаларининг босқичма-босқич ўзини ўзи молиялаштиришга ўтиш истиқболлари» мавзуида матбуот анжумани ўтказилди.
2020 йилнинг 1 январидан мазкур янги тизимда ўз фаолиятини бошлаган ОТМлар қаторида Тошкент давлат юридик университети ҳам мавжуд. «Дарё» мухбирининг хабар беришича, тадбирда ушбу олийгоҳ ректори Раҳимжон Ҳакимов тизим афзалликлари ва бу борадаги айрим режаларига тўхталиб ўтди.
«Ўзини ўзи молиялаштириш тизимига ўтиш туфайли ОТМларга молиявий нуқтаи назардан жуда катта имконият яратиляпти. Шу ўринда энг муҳим иккитасини айтиб ўтмоқчиман. Биринчиси, иқтидорли, ижтимоий ҳимояга муҳтож талабаларга моддий ёрдам бериш имконияти туғиляпти. Буни олий таълим муассасининг ўзи ОТМ кенгаши қарори билан белгилайди. Талабалар сони ва мезонини ҳам мустақил ишлаб чиқади.
Иккинчи муҳим имконият шуки, бугунги бозор конектурасидан келиб чиқиб, яхши ишлаётган, самарали меҳнат қилаётган ходимлар, профессор-ўқитувчиларнинг ойлик иш ҳақларига устамалар белгилаш ҳуқуқи берилди», — деди Тошкент давлат юридик университети ректори Раҳимжон Ҳакимов.
Ректорнинг сўзларига кўра, ўзини ўзи молиялаштириш тизими фақатгина тўлов-контракт миқдорини ошириш ҳисобидан ўзини ўзи қоплаш дегани эмас. Турли стартаплар, малака ошириш ва ўқув курслари, ёзги оромгоҳлар ҳам ташкил этиб, ОТМга қўшимча пул тушириш имкониятлари туғиляпти.
«Масалан, биз 30 дан ортиқ чет эллик ҳамкорларимиз билан музокаралар олиб бордик. Шу йил ёзда хорижлик талабаларга ёзги оромгоҳ ташкил қилмоқчимиз. Чет эллик ёшларда катта қизиқиш бор. 100 нафардан ортиқ йигит-қизларни жалб қилиб, муайян даражада ҳам пул ишлаймиз, ҳам инвестиция киритилади, ҳам Ўзбекистоннинг ҳуқуқий маданиятини хорижликларга тарғиб қилишга эришамиз.
Шунингдек, инвесторлар учун алоҳида «Ўзбек ҳуқуқи» курсларини йўлга қўймоқчимиз. Қайси корхоналарга қайси йўналишда ҳуқуқий малака ошириш курслари керак бўлса, бу бўйича ҳам юридик хизматлар ташкил этишни режалаштиряпмиз», — деди Адлия вазири ўринбосари, Тошкент давлат юридик университети ректори Раҳимжон Ҳакимов.
Изоҳ (0)