9-yanvar kuni soat 21:20 da Qirg‘iziston fuqarolari hech qanday asossiz Tojikiston fuqarosi Zafar A’zamovga hujum qilib, uning avtomobili oynalarini sindirib tashladi, deb xabar beradi Asia Plus.
Manbalarning so‘zlariga ko‘ra 9-yanvarda 10-yanvarga o‘tar kechasi taxminan soat 02:00 larda qirg‘iz tomoni havoga qarata tartibsiz o‘q uza boshlagan. O‘qlar “Kalashnikov” avtomati va ov miltig‘idan bittalab otilgan. “O‘qlar ovozi soat 02:30 larda, ikkala tomonning IIB va chegarachi xizmati vakillari aralashganidan so‘ng tindi. Tojikiston tomonidan halok bo‘lgan yoki jarohat olganlar yo‘q”, — deyiladi xabarda.
Mazkur holat bo‘yicha Qirg‘iziston davlat chegara xizmati tomonidan bildirilgan bayonotda keltirilishicha, 10-yanvarga o‘tar kechasi soat 00:40 da Botken tumanidagi Jaka-Oruk hududida noma’lum shaxslar Botken shahri tomon yo‘l olgan Qirg‘iziston fuqarosiga tegishli mashinani toshbo‘ron qilib, Tojikiston hududiga yashiringan.
Qirg‘iziston huquq-tartibot oganlarining ma’lumotlariga ko‘ra mashina ichida bo‘lgan fuqarolar jarohat olgan. Mashinaning orqa va yon oynalari singan.
Ta’kidlashicha, sodir bo‘lgan voqeadan bir soatlar o‘tib, Tojikiston fuqarolari Botkendan Ko‘ktosh qishlog‘iga yo‘l olgan boshqa bir Qirg‘iziston fuqarosining mashinasini toshbo‘ron qilgan. Natijada avtomashinaning old oynasi singan.
“Soat taxminan 02:40 da Tojikiston fuqarolari Daxmadagi Qirg‘iziston fuqarosining uyiga toshlar yog‘dirdi. Huquq-tartibot oganlari vakillari bilan Qirg‘iziston fuqarosining uyi tomon yo‘l olgan chegarachilar Tojikiston tomonidan kichik kalibrli ov miltig‘idan o‘qqa tutildi”, — deyiladi Qirg‘iziston Davlat chegara xizmati xabarida.
Eslatib o‘tamiz, 2019-yilning iyun oyida ham tojik-qirg‘iz chegarasida kelishmovchilik yuz berib, qirg‘izistonliklar 45 kilometrli avtoyo‘lni ta’mirlash ishlariga qarshi chiqqandi. Sentabr oyida esa Qirg‘iziston—Tojikiston chegarasida yuz bergan otishmada qirg‘iz harbiy xizmatchisi halok bo‘lgandi.
Izoh (0)