Livan prokuraturasi Renault-Nissan-Mitsubishi avtokonsernining sobiq rahbari Karlos Gonga mamlakatni tark etishni taqiqlab qo‘ydi. Ushbu qaror Interpolning Yaponiyadagi byurosi iltimosiga ko‘ra Gonni qo‘lga olishga order bergani bilan bog‘liq.
Prokurorlar Gondan Fransiya pasportini topshirishni so‘ragan. Avval Nissan konserni sobiq rahbari 2 soat davomida so‘roq qilingani ma’lum bo‘lgandi.
Gondan Livanda yashaydigan manzilini ko‘rsatish, mamlakat bilan rasman urush holatida bo‘lgan Isroilga 2008-yilda amalga oshirgan safarining tafsilotlari, u yerda kimlar bilan uchrashgani, nimalar bo‘lgani haqida so‘ralgan.
Gonni ushlash uchun Interpol tomonidan berilgan ruxsatnomaning bajarilishi majburiy emas. Livan hamda Yaponiya o‘rtasida gumonlanuvchilarni o‘zaro ekstraditsiya qilish borasida xalqaro kelishuvlar imzolanmagan. Shu sababli Kunchiqar yurt vakillarining Gonni olib ketib, Yaponiyada unga nisbatan ayblovlar e’lon qilish haqidagi rejalari amalga oshmasligi mumkin.
Sobiq top-menejer korporatsiya pullarini o‘z ehtiyojlari uchun sarflash, ishonchni suiste’mol qilib pullarni o‘zlashtirish va real daromadlarni yashirishga uringanlikda ayblanmoqda.
Tokioda uy qamog‘ida bo‘lgan Gonn dekabr oxirida Yaponiyadan Livanga qochib ketgandi. Uni qochib yuborgan yetti nafar odam Turkiyada hibsga olingan. Keyinchalik aeroport xodimi agar Goning qochishiga yordam bermasa oilasiga zarar yetishi haqida tahdidlar bo‘lganini qayd etgan. 8-yanvarda Nissan sobiq rahbarining rafiqasi Kerol Naxas erining ishi bo‘yicha so‘roqda yolg‘on ko‘rsatmalar berganlikda gumon qilingan va Yaponiya prokuraturasiga ayolni hibsga olish yuzasidan order berilgandi.
Izoh (0)