Toshkentdagi Milliy stadion oldida 10-yanvar kuni tongda “Fayzli Toshkent” aksiyasining boshlanishiga bag‘ishlangan marosim ma’lum o‘tdi. Unda shahar hokimi Jahongir Ortiqxo‘jayev chiqish qilib, aksiya ishtirokchilariga omad tiladi hamda ularga minnatdorchilik bildirdi, deya xabar bermoqda “Daryo” muxbiri Madina Nurman.
Toshkentda markaziy ko‘cha, maydon va xiyobonlar muntazam obodonlashtirilgani bilan, umuman qarovsiz qolib ketgan hududlar ham bor. “Fayzli Toshkent” aksiyasini o‘tkazish orqali yaqin ikki oy muddatda shahar miqyosida keng ko‘lamli tozalash va obodonlashtirish tadbirlari olib boriladi. Ushbu aksiyani Prezident Shavkat Mirziyoyev ham qo‘llab-quvvatlagan.
Muhtaram Prezidentimiz Toshkentni juda sevadilar va ulug‘laydilar. Toshkentni ozoda qilishga qaratilgan “Fayzli Toshkent” tashabbusini ham qo‘llab-quvvatlab, bizga dalda bo‘lib turibdilar. Shunday qilishimiz kerakki, Toshkentning har bir fuqarosi, g‘ururlanib: “Men fayzli Toshkentda yashayman” degan fikr bilan yashasin. Shunday darajaga erishaylikki, biror kimsa ko‘chaga axlat tashlashdan yoki yashab turgan ko‘chasini iflos qilishdan uyalib qolsin.Qayd etishlaricha, aksiyaga shahar Obodonlashtirish bosh boshqarmasining 1000 nafar ishchi-xizmatchilari jalb etiladi. Aksiya doirasida shaharning 30 ming gektardan ortiq hududi, mavze va daharlardagi qabristonlar, ko‘pdan beri qarovsiz bo‘lgan ichki ko‘chalar, ariqlar tozalanadi, daraxtlarga shakl beriladi.Bu katta tashabbusimizda barchaning — shifokorlarimiz o‘z shifokorlik ishlari bilan, o‘qituvchilarimiz tarbiyaviy ishlari bilan, o‘quvchilarimiz tarbiyalari bilan ishtirok etishlarini istardim; korxona-tashkilotlar atrofi va ichki hududini tozalab, fayzli va obod qilsalar, jurnalistlarimiz va blogerlarimiz mana shu tashabbusni yaxshi yoritib borsalar — bu ham hashar. Ota-onalarimiz duolari bilan hasharda ishtirok etishlarini chin dildan istab qolardim.
Bugun boshlangan ushbu tashabbus, o‘ylaymanki, ko‘p yillar davom etadi va shahrimizga haqiqatan ham fayz keltiradi. Yagona iltimosim — fidokorlik bilan ishlang! Yana bir iltimosim — birorta ham daraxt kesilishiga yo‘l qo‘ymang, daraxt kesilishi — jinoyat. Aksiya mobaynida Chilonzor tumaniga 10 mingdan ortiq daraxt ekamiz, har bir tumanda daraxtlarni ko‘paytiramiz. Lekin daraxtlarni kesishga hech kimning haqi yo‘q.
O‘ylaymanki, hammangiz ushbu tashabbusda chin dilingizdan ishtirok etasiz. O‘z navbatida, bloger va jurnalistlarimizdan ushbu aksiyani keng yoritishda yuraklarini biroz yumshatishni iltimos qilardim. Bunday aksiyalar nafaqat Toshkentda, balki boshqa hududlarda ham bo‘lishini, butun mamlakatimizga fayzu baraka yog‘ilishini istab qolardim. Hammangizga ming rahmat!
Jahongir Ortiqxo‘jayev, Toshkent shahar hokimi
Tungi paytda talab darajasida yoritilmaydigan joylarga qo‘shimcha yoritish vositalari o‘rnatiladi. Bu ishlar uchun poytaxtdagi tegishli boshqarmalardan maxsus texnikalar jalb etiladi.
Poytaxt ma’muriyatining alohida qayd etishicha, bu umumxalq hashari emas, balki hokimlik hisobidan amalga oshirilgan aksiya. Shunga qaramay, aksiyada aholining ko‘ngilli ishtiroki olqishlanadi. Bu ishtirok eng minimal darajada — chiqindilarni faqat belgilangan joylarga tashlash bilan ham bo‘lishi mumkin.
Izoh (0)