Тошкентдаги Миллий стадион олдида 10 январь куни тонгда «Файзли Тошкент» акциясининг бошланишига бағишланган маросим маълум ўтди. Унда шаҳар ҳокими Жаҳонгир Ортиқхўжаев чиқиш қилиб, акция иштирокчиларига омад тилади ҳамда уларга миннатдорчилик билдирди, дея хабар бермоқда «Дарё» мухбири Мадина Нурман.
Тошкентда марказий кўча, майдон ва хиёбонлар мунтазам ободонлаштирилгани билан, умуман қаровсиз қолиб кетган ҳудудлар ҳам бор. «Файзли Тошкент» акциясини ўтказиш орқали яқин икки ой муддатда шаҳар миқёсида кенг кўламли тозалаш ва ободонлаштириш тадбирлари олиб борилади. Ушбу акцияни Президент Шавкат Мирзиёев ҳам қўллаб-қувватлаган.
Муҳтарам Президентимиз Тошкентни жуда севадилар ва улуғлайдилар. Тошкентни озода қилишга қаратилган «Файзли Тошкент» ташаббусини ҳам қўллаб-қувватлаб, бизга далда бўлиб турибдилар. Шундай қилишимиз керакки, Тошкентнинг ҳар бир фуқароси, ғурурланиб: «Мен файзли Тошкентда яшайман» деган фикр билан яшасин. Шундай даражага эришайликки, бирор кимса кўчага ахлат ташлашдан ёки яшаб турган кўчасини ифлос қилишдан уялиб қолсин.Қайд этишларича, акцияга шаҳар Ободонлаштириш бош бошқармасининг 1000 нафар ишчи-хизматчилари жалб этилади. Акция доирасида шаҳарнинг 30 минг гектардан ортиқ ҳудуди, мавзе ва даҳарлардаги қабристонлар, кўпдан бери қаровсиз бўлган ички кўчалар, ариқлар тозаланади, дарахтларга шакл берилади.Бу катта ташаббусимизда барчанинг — шифокорларимиз ўз шифокорлик ишлари билан, ўқитувчиларимиз тарбиявий ишлари билан, ўқувчиларимиз тарбиялари билан иштирок этишларини истардим; корхона-ташкилотлар атрофи ва ички ҳудудини тозалаб, файзли ва обод қилсалар, журналистларимиз ва блогерларимиз мана шу ташаббусни яхши ёритиб борсалар — бу ҳам ҳашар. Ота-оналаримиз дуолари билан ҳашарда иштирок этишларини чин дилдан истаб қолардим.
Бугун бошланган ушбу ташаббус, ўйлайманки, кўп йиллар давом этади ва шаҳримизга ҳақиқатан ҳам файз келтиради. Ягона илтимосим — фидокорлик билан ишланг! Яна бир илтимосим — бирорта ҳам дарахт кесилишига йўл қўйманг, дарахт кесилиши — жиноят. Акция мобайнида Чилонзор туманига 10 мингдан ортиқ дарахт экамиз, ҳар бир туманда дарахтларни кўпайтирамиз. Лекин дарахтларни кесишга ҳеч кимнинг ҳақи йўқ.
Ўйлайманки, ҳаммангиз ушбу ташаббусда чин дилингиздан иштирок этасиз. Ўз навбатида, блогер ва журналистларимиздан ушбу акцияни кенг ёритишда юракларини бироз юмшатишни илтимос қилардим. Бундай акциялар нафақат Тошкентда, балки бошқа ҳудудларда ҳам бўлишини, бутун мамлакатимизга файзу барака ёғилишини истаб қолардим. Ҳаммангизга минг раҳмат!
Жаҳонгир Ортиқхўжаев, Тошкент шаҳар ҳокими
Тунги пайтда талаб даражасида ёритилмайдиган жойларга қўшимча ёритиш воситалари ўрнатилади. Бу ишлар учун пойтахтдаги тегишли бошқармалардан махсус техникалар жалб этилади.
Пойтахт маъмуриятининг алоҳида қайд этишича, бу умумхалқ ҳашари эмас, балки ҳокимлик ҳисобидан амалга оширилган акция. Шунга қарамай, акцияда аҳолининг кўнгилли иштироки олқишланади. Бу иштирок энг минимал даражада — чиқиндиларни фақат белгиланган жойларга ташлаш билан ҳам бўлиши мумкин.
Изоҳ (0)