Xalqaro press klub raisi, Jurnalistika va ommaviy kommunikatsiyalar universiteti rektori Sherzod Qudratxo‘jayev odamlarni jamoat joylarida o‘zini tutishi va atrof-muhitga munosabatda madaniyatsizlikda aybladi. Sherzod Qudratxo‘jayev mazkur masala bo‘yicha fikrlarini Facebook’da e’lon qilgan.
Tog‘da ham, shaharda ham, ziyoratgohlarda ham odamlar madaniyati, o‘zini tutishi bir xil bo‘lib qolyapti.Mumkin bo‘lmasa ham o‘zi tugul yosh farzandlarini qizil cheklovdan olib o‘tadi, jamoat joyida xorijiy va mahalliy tamakini sasitib chekadi, “Chekmang!!!” desangiz dimog‘ingizga, hatto go‘dakni yuziga tutatib “Man uyingda chekmayapmanku” deb jerkib so‘kib tashlaydi “mujik” deb bilib o‘zini. O‘nlab tualetlar turganida ona 5 yashar bolasini ochiq tabiatda xojatini chiqarganini o‘zim ko‘rdim.
Ertaga bu bola chorrahada ham qizilga to‘xtamaydi, chelak turganda ham axlatini yerga uloqtiradi, mashinasi eshigini ochib chorrahada nos tupuradi, chalasiga uyalmay baklashkadagi suv bilan og‘zini g‘ar-g‘ara qilib chayib barchaga tomosha bo‘ladi.Ilgari yoshi kattalar birovni bolasi bo‘lsa ham tanbeh va dakki berardilar, nasihat qilardilar? Qani bu avlod?
Odamda madaniyat, odob, istihola, farosat yo bo‘ladi yo umuman bo‘lmaydi.Bir qarich Vatan zaminiga zor millatlar bor bugun dunyoda, biz esa muqaddas Ona zaminimizga nos tupurish va axlat tashlash bilan ovoramiz...
Ming afsus...Davlat Qodiriyni qaytarayotganida, Xorazmiy maktablarini ochayotganida, qishloqu-shaharlar yangilanayotgan bir davrda millat nima qilyapti, Millat O‘zligini qachon anglaydi?
Zangiota majmuasimi, qadim Samarqand-u Buxoroning ziyoratgohlari, Sangardak suv maskanimi, Chimyon, Zomin tog‘larimi, Toshkent City’mi manzara bir xil.. Axir biz ko‘hna tarix shodasidagi bir marvaridku, deb ko‘ksimizga uramiz, nahotki unutdikmi shuni?
Falonchilar avlodimiz deb ularni nomini aytib shunday qilishimiz uyat emasmi?Qachon millat buni anglaydi?
O‘z uyini iflos qilmaydiku inson, O‘zbekiston katta uyimiz, buyuk Vatanimiz emasmi?Nima chora ko‘rish kerak deb o‘ylaysizlar?
Sherzod Qudratxo‘jayev, Xalqaro press klub raisi, Jurnalistika va ommaviy kommunikatsiyalar universiteti rektori
Izoh (0)