O‘zbekistonda talabalarga “beshlik” va “to‘rtlik” stipendiya berish qayta yo‘lga qo‘yiladi

Oliy Majlis Qonunchilik palatasi deputati Rasul Kusherbayev o‘zining Telegram’dagi kanali orqali “beshlik” va “to‘rtlik” stipendiyalar yana qaytishi mumkinligini ma’lum qildi.

Bugun bosh vazir o‘rinbosari Aziz Abduhakimov bilan talabalarga stipendiya tayinlash tartibi bo‘yicha hukumat qarori loyihasini muhokama qildik.

Ko‘pchilik talabalarning murojaatlarini inobatga olgan holda bildirilgan takliflar ham loyihada aks ettirilib, ushbu qaror qabul qilinishi bilan a’lochi, faol, besh bahoga o‘qiyotganlar ilgarigidek yuqori, to‘rtga o‘qiyotganlar esa o‘z nomi bilan to‘rtlik, uch bahoga o‘qiganlar esa uchlik stipendiya olishi kutilmoqda.

Oddiy aytganda har kim o‘z intilishi va izlanishiga qarab stipendiya oladi.

Loyihada yana bir qator yaxshi yangiliklar bor. Yaxshisi tez kunlarda qabul qilingach bilib olamiz.

Nasib bo‘lsa hujjat tez kunlarda qabul qilinadi.

Rasul Kusherbayev, Oliy Majlis Qonunchilik palatasi deputati

Rasul Kusherbayev avvalroq ham Oliy ta’lim tizimida kontrakt, stipendiya talabalar uchun hayot-mamot darajasidagi masalalarda barqarorlikning yo‘qligi ta’lim sifati qolib, talabalarda ta’limga bo‘lgan ixlosning qaytishiga olib kelishi mumkinligini, 400 ming so‘m hech nimaga yetmasligini ma’lum qilib, mutasaddilarga “Siz talaba bo‘lmaganmisiz?” deya savolni o‘rtaga tashlagandi.

Eslatib o‘tamiz, 2019/2020-o‘quv yilidan boshlab O‘zbekiston OTMlarida davlat granti va to‘lov-kontraktda o‘qiydigan barcha talabalarga bir xil 400 ming so‘m stipendiya belgilangan edi.

Shuningdek, bakalavriat, magistratura va ikkinchi mutaxassislik bo‘yicha kunduzgi ta’lim shaklida to‘lov-kontrakt asosida tahsil olayotgan talabalar kontrakt miqdorini stipendiyali yoki stipendiyasiz holda to‘lovlarni amalga oshirishlari mumkin bo‘ldi.