“O‘zbekipaksanoat” uyushmasi tizimida 2019-yil yakuniga ko‘ra, jami 640 mingta ish o‘rni mavjud bo‘lib, shundan 18 300 tasi doimiy, 621 800 tasi mavsumiy ish o‘rinlari hisoblanadi. Bu haqda 7-yanvar kuni AOKAda OAV vakillari uchun bo‘lib o‘tgan brifingda ma’lum qilindi.
Mazkur ishchilarning barchasiga mehnat daftarchasi ochilib, bir yillik ish staji yozib borilmoqda. Joriy yil yakuniga qadar muntazam mehnatkashlar sonini 24 440 nafarga, mavsumiy (kasanachilik asosida ipak qurti boquvchi fuqarolar) ishchilar sonini esa 736 567 nafarga yetkazish rejalashtirilgan.
“Tutchilikni rivojlantirish borasida jiddiy ishlarga bel bog‘laganmiz. Prezidentimizning sohamizga oid qarorlarida ham zimmamizga qator vazifalar yuklatilgan. Davlatimiz rahbari Surxondaryoga tashrifi davomida tut ekish, tutzorlar barpo etish yo‘lida 20 ming gektar yer maydoni ajratish bo‘yicha topshiriq bergandi. Hozir bu bo‘yicha qaror loyihasi tayyorlanmoqda.
O‘zbek ipak matolari sifatini yaxshilashimiz kerak. Sifatli pilladan sifatli ipak bo‘ladi. Yevropaning taniqli brendlari dastgohlarini Yaponiya, Koreya, Xitoydan olib kelyapmiz. Lekin dastgohga mos keladigan mahsulotni ham o‘zimiz ishlab chiqarishimiz kerak. Buning uchun ishni bargning sifatidan boshlashimiz kerak. Barg sifati yaxshilanmas ekan, sifatli pilla ololmaymiz.
Bitta pilladan 1,5 ming metrgacha ip chiqadi. Hozirgi kunda yetarli darajada ozuqa yemagan pilla 1,5 ming metrli ipakni bermaydi. 400, 500, 600 metr bo‘lib qoladi va uziluvchan bo‘ladi. Dastgohlarga to‘g‘ri kelmay qolyapti. Shuning uchun biz 2020-yilda butun e’tiborimizni ozuqa bazasiga qaratyapmiz. Intensiv tutzorlarni yaratyapmiz. O‘rma tutzor bo‘ladi. Oldingidek tut daraxti chopilmaydi, balki barglar yulinadi yoki o‘riladi”, — dedi “O‘zbekipaksanoat” uyushmasi rais o‘rinbosari Olimjon Jumayev.
Tadbir mobaynida uyushma rasmiysi 2020-yildagi rejalarining ayrimlariga ham to‘xtalib o‘tdi.
“Oldimizda turgan eng dolzarb masalalaridan biri pilla yetishtirishdir. Sababi, pilla bo‘lmasa, ipak ham, eksport ham bo‘lmaydi. Hammasi xomashyo bazasiga bog‘liq. Joriy yil bu boradagi ko‘rsatkichni ham oshirmoqchimiz. Yilda 4 marta pilla boqishni yanada kengaytirish evaziga 21 ming tonna pilla xomashyosini yetishtirishni maqsad qilganmiz. Pillani qayta ishlash natijasida 2 600 tonna xom ipak yetishtirishni ko‘zlaganmiz. 2020-yildan jahon bozorida erkin raqobatlasha oladigan mahsulotlarimiz bilan Yevropa va Amerika bozorlariga kirib borish niyatidamiz.
Shu kunlarda Italiya, Koreya, Yaponiya singari mamlakatlardan 12 nafar dizayner, texnologlar yurtimizda bo‘lib, mutaxassislarimizga ko‘nikmalar hosil qilishda ko‘maklashyapti. O‘tgan yili uyushma hisobidan 45 nafar vakilimiz Xitoyda malaka oshirib qaytgandi. Bular asta-sekin o‘z mevasini berishi shubhasiz”, — dedi Jumayev.
Matbuot anjumanida berilgan ma’lumotlarga ko‘ra, sohada eksport hajmi 2017-yilda 30,9 million dollar, 2018-yilda 50,7 million dollarni tashkil qilgan (o‘sish sur’ati 19,8 million dollar yoki 64 foizdan ko‘p). 2019-yilda 65,2 million dollarlik ipak mahsulotlari eksport qilish prognozi ortig‘i bilan uddalangan, ya’ni yil yakuniga qadar bu ko‘rsatkich 70 million dollarga yetkazilgan.
Izoh (0)