O‘zbekiston hududida ishlab chiqarilgan vino mahsulotlarining reklamasiga joriy yilda ruxsat berilishi mumkin. Mazkur o‘zgarish O‘zbekiston Moliya vazirligi tomonidan e’lon qilingan Prezidentning “Iste’mol etil spirti, alkogol va tamaki mahsulotlarini realizatsiya qilish tartibini takomillashtirishga oid qo‘shimcha chora-tadbirlari to‘g‘risida“ qarori loyihasida nazarda tutilgan.
Qaror loyihasiga ko‘ra, O‘zbekiston Respublikasi Monopoliyaga qarshi kurashish qo‘mitasiga ikki oy muddatda mahalliy ko‘piklanadigan va tabiiy vino mahsulotlari namunalarini jamoat joylarida tekin tarqatishni istisno etgan holda, ularning reklamasiga ruxsat berishni nazarda tutuvchi tegishli qonun loyihasini ishlab chiqish va Vazirlar Mahkamasiga kiritish vazifasi yuklatilgan.
Quyidagi hollarda mahalliy vino mahsulotlarining reklamasiga ruxsat berish rejalashtirilmoqda:
- mehmonxonalar, savdo va umumiy ovqatlanish korxonalari savdo zalining ichki qismida hamda mahsulotlarni namoyish va degustatsiya qilish joylarida;
- axborot mahsulotining yoshga oid tasnifini ko‘rsatgan holda ishlab chiqaruvchi va savdo korxonalarining rasmiy veb-saytlarida;
- temir yo‘l va havo transporti vositalarida;
- televideniyeda mahalliy vaqt bilan soat 22:00 dan 07:00 gacha namoyish qilinishiga.
Izoh (0)