AQSh Davlat departamenti delegatsiyasini O‘zbekiston Prezidenti Shavkat Mirziyoyev qabul qiladi.
Xabar berilishicha, tashrif dasturida O‘zbekiston Tashqi ishlar vazirligida ikki tomonlama muzokaralar o‘tkazish ko‘zda tutilgan bo‘lib, unda 2018-yil may oyida Vashington shahrida bo‘lib o‘tgan oliy darajadagi O‘zbekiston—AQSh uchrashuvi doirasida erishilgan kelishuvlarning bajarilishi hamda xalqaro muammolar yuzasidan fikr almashish rejalashtirilgan.
Bundan tashqari, 6-yanvar kuni AQSh Davlat kotibi “Markaziy Osiyo—AQSh” formatidagi vazirlar uchrashuvida (“C5+1”) ham ishtirok etadi. Tomonlar mintaqaviy hamkorlikka oid masalalarni, xususan, iqtisodiy hamkorlikni rivojlantirish, chegara xavfsizligini mustahkamlash, shuningdek, Markaziy Osiyoning savdo va transport tizimlariga Afg‘onistonni integratsiya qilishni muhokama qiladi.
Agar ushbu tashrif amalga oshsa, bu Pompeoning AQSh davlat kotibi sifatida O‘zbekistonga ilk safari bo‘ladi. Qayd etish joiz, O‘zbekiston mustaqillikka erishganidan buyon Jeyms Beyker, Madlen Olbrayt, Kolin Pauell, Hillari Klinton, Jon Kerri kabi AQSh davlat kotiblari mamlakatga tashrif buyurgan.
Ma’lumot uchun, davlat kotibi — AQSh ijro hokimiyati iyerarxiyasida prezident va vitse-prezidentdan keyingi eng yuqori martabali uchinchi lavozimdir. Ayni vaqtda, ushbu lavozim egasi AQSh davlat rahbari lavozimini egallovchilar navbatida to‘rtinchi hisoblanadi (ya’ni, bir vaqtning o‘zida ham prezident, ham vitse-prezident, ham Senatning muvaqqat prezidenti davlat rahbari vazifasini bajara olmaydigan holat yuzaga kelsa, davlat kotibi muvaqqat prezidentga aylanadi).
Izoh (0)