АҚШ Давлат департаменти делегациясини Ўзбекистон Президенти Шавкат Мирзиёев қабул қилади.
Хабар берилишича, ташриф дастурида Ўзбекистон Ташқи ишлар вазирлигида икки томонлама музокаралар ўтказиш кўзда тутилган бўлиб, унда 2018 йил май ойида Вашингтон шаҳрида бўлиб ўтган олий даражадаги Ўзбекистон—АҚШ учрашуви доирасида эришилган келишувларнинг бажарилиши ҳамда халқаро муаммолар юзасидан фикр алмашиш режалаштирилган.
Бундан ташқари, 6 январь куни АҚШ Давлат котиби «Марказий Осиё—АҚШ» форматидаги вазирлар учрашувида («C5+1») ҳам иштирок этади. Томонлар минтақавий ҳамкорликка оид масалаларни, хусусан, иқтисодий ҳамкорликни ривожлантириш, чегара хавфсизлигини мустаҳкамлаш, шунингдек, Марказий Осиёнинг савдо ва транспорт тизимларига Афғонистонни интеграция қилишни муҳокама қилади.
Агар ушбу ташриф амалга ошса, бу Помпеонинг АҚШ давлат котиби сифатида Ўзбекистонга илк сафари бўлади. Қайд этиш жоиз, Ўзбекистон мустақилликка эришганидан буён Жеймс Бейкер, Мадлен Олбрайт, Колин Пауэлл, Hillари Клинтон, Жон Керри каби АҚШ давлат котиблари мамлакатга ташриф буюрган.
Маълумот учун, давлат котиби — АҚШ ижро ҳокимияти иерархиясида президент ва вице-президентдан кейинги энг юқори мартабали учинчи лавозимдир. Айни вақтда, ушбу лавозим эгаси АҚШ давлат раҳбари лавозимини эгалловчилар навбатида тўртинчи ҳисобланади (яъни, бир вақтнинг ўзида ҳам президент, ҳам вице-президент, ҳам Сенатнинг муваққат президенти давлат раҳбари вазифасини бажара олмайдиган ҳолат юзага келса, давлат котиби муваққат президентга айланади).
Изоҳ (0)