30-dekabr, dushanba kuni Oliy Majlis Senatida Odam savdosiga va majburiy mehnatga qarshi kurashish milliy komissiyasi majlis o‘tkazdi. Majlisni komissiya raisi — Senat rahbari Tanzila Norboyeva olib bordi. Bu haqda “Kun.uz” xabar berdi.
Ma’lum qilinishicha, majlisda so‘zga chiqqan ichki ishlar vazirining birinchi o‘rinbosari Aziz Toshpo‘latov xorijiy davlatlarda odam savdosi qurboni bo‘lgan va qiyin ahvolga tushib qolgan fuqarolarni Vatanga qaytarib olib kelishdagi muammolar haqida gapirgan.
Uning so‘zlariga ko‘ra, bunda asosiy muammolar yo‘l xarajatlari va jabrlanganlarga vaqtincha yashab turish uchun uy-joy va oziq-ovqatga sarflanadigan pul mablag‘larini qoplashga qaratilgan jamg‘arma yoki manba mavjud emasligi hisoblanadi. Hattoki O‘zbekistonning chet davlatlardagi konsullik xizmatlarida ham shunday muammolar yuzaga kelmoqda.
Qayd etilishicha, odam savdosi qurboni bo‘lgan yoki qiyin ahvolga tushib qolgan fuqarolarga nafaqat yuqorida aytib o‘tilgan yordamlarni, balki tibbiy, ijtimoiy, yuridik hamda boshqa yordamlarning ko‘rsatilishini inobatga olgan holda xalqaro ekspertlar tomonidan berilgan tavsiyalar asosida odam savdosi jabrdiydalari uchun fond tashkil qilish taklif qilingan.
Vazir o‘rinbosari odam savdosi jabrdiydalariga yordam berish bo‘yicha respublika reabilitatsiya markazida zaruriy yordam ko‘rsatilishi xalqaro standartlarga mos kelmasligini ham qayd etdi.
Uning so‘zlariga ko‘ra, hozirgi kunda 1 nafar jabrlanuvchi uchun tibbiy dori-darmonlarga ajratiladigan mablag‘ miqdori (10 kun uchun) 49 ming so‘mni tashkil qilmoqda hamda kunlik ovqatlanish uchun 11 900 so‘m pul ajratiladi. Bu masalada ham qo‘shimcha mablag‘ bilan ta’minlashni ko‘rib chiqish maqsadga muvofiqligi ta’kidlandi.
Bunga javoban Senat raisi Tanzila Norboyeva barcha tuzilmalar, jumladan, Xotin-qizlar qo‘mitasi, Fuqarolarning o‘zini o‘zi boshqarish organlari faoliyatini muvofiqlashtirish bo‘yicha Respublika kengashi va Yoshlar ittifoqida fondlar borligini aytib o‘tdi.
Tanzila Norboyeva ana shu mavjud fondlardan samarali foydalanish kerakligini ta’kidladi. Ularning faoliyatida ham odam savdosi jabrdiydalariga yordam ko‘rsatish yo‘nalishi borligi, barcha nodavlat tashkilotlariga keragidan ortiq mablag‘ berilgani ta’kidlandi.
Komissiya raisi pullardan maqsadli hamda samarali foydalanish uchun mutasaddi vazirliklar vakillaridan iborat ishchi guruh tuzish va Moliya vazirligiga takliflar kiritish bo‘yicha topshiriq berdi.
Izoh (0)