O‘zbekiston Prezident Shavkat Mirziyoyev 27-dekabr, juma kuni Muhammad al-Xorazmiy nomidagi maktabda yoshlar bilan o‘tkazilgan uchrashuvda yangi institut tashkil etishni taklif qildi. Bu haqda “Kun.uz” xabar berdi.
Prezident bugungi kunda barcha sohalarda bilimli, siyosiy va ijtimoiy faol, xalq manfaatini o‘z shaxsiy manfaatidan ustun qo‘yadigan, halol va jonkuyar yosh rahbarlarga ehtiyoj tobora ortib borayotganini ta’kidladi.
“Bugun barcha sohalarda bilimli, siyosiy va ijtimoiy faol, xalq manfaatini o‘z shaxsiy manfaatidan ustun qo‘yadigan, halol va jonkuyar, yosh rahbarlarga ehtiyoj tobora ortib bormoqda. Biz dunyoqarashi keng, kreativ fikrlaydigan, muammoli vaziyatlarda to‘g‘ri qarorlar qabul qila oladigan yoshlarni mas’uliyatli vazifalarga tayinlayapmiz. Ammo mamlakatimizda yosh rahbarlarni saralaydigan, ularning layoqatiga mos lavozimlarni taklif etadigan samarali mexanizm mavjud emas”, — dedi Shavkat Mirziyoyev.
“Rahbarlik lavozimlariga har tomonlama munosib, tashabbuskor, menga tayanch va suyanch bo‘la oladigan yoshlardan “Vatan iftixorlari” institutini joriy etsak, sizlar nima deysizlar? Bu institutning asosiy vazifasi islohotlarimiz va katta rejalarimizni vatanimiz yoshlariga yetkazish, joylardagi muammolarni olib chiqish va ularni hal qilishdan iborat. Sizlarning orangizda “Men Sizning yoningizda turib, kamarbasta bo‘laman!” deb ko‘zi yonib turgan, jasoratli, iftixor qilsa arziydigan yigit-qizlar borligiga ishonaman!”, — deya so‘zini davom ettirdi davlat rahbari.
Shu munosabat Prezident tomonidan Davlat xizmatini rivojlantirish agentligi va Yoshlar ittifoqiga ushbu yangi institutning faoliyatini tashkil etish va vakolatini belgilash yuzasidan bir oy muddatda aniq taklif kiritish topshirig‘i berilgan.
Izoh (0)