Ўзбекистон Президент Шавкат Мирзиёев 27 декабрь, жума куни Муҳаммад ал-Хоразмий номидаги мактабда ёшлар билан ўтказилган учрашувда янги институт ташкил этишни таклиф қилди. Бу ҳақда «Kun.uz» хабар берди.
Президент бугунги кунда барча соҳаларда билимли, сиёсий ва ижтимоий фаол, халқ манфаатини ўз шахсий манфаатидан устун қўядиган, ҳалол ва жонкуяр ёш раҳбарларга эҳтиёж тобора ортиб бораётганини таъкидлади.
«Бугун барча соҳаларда билимли, сиёсий ва ижтимоий фаол, халқ манфаатини ўз шахсий манфаатидан устун қўядиган, ҳалол ва жонкуяр, ёш раҳбарларга эҳтиёж тобора ортиб бормоқда. Биз дунёқараши кенг, креатив фикрлайдиган, муаммоли вазиятларда тўғри қарорлар қабул қила оладиган ёшларни масъулиятли вазифаларга тайинлаяпмиз. Аммо мамлакатимизда ёш раҳбарларни саралайдиган, уларнинг лаёқатига мос лавозимларни таклиф этадиган самарали механизм мавжуд эмас», — деди Шавкат Мирзиёев.
«Раҳбарлик лавозимларига ҳар томонлама муносиб, ташаббускор, менга таянч ва суянч бўла оладиган ёшлардан «Ватан ифтихорлари» институтини жорий этсак, сизлар нима дейсизлар? Бу институтнинг асосий вазифаси ислоҳотларимиз ва катта режаларимизни ватанимиз ёшларига етказиш, жойлардаги муаммоларни олиб чиқиш ва уларни ҳал қилишдан иборат. Сизларнинг орангизда «Мен Сизнинг ёнингизда туриб, камарбаста бўламан!» деб кўзи ёниб турган, жасоратли, ифтихор қилса арзийдиган йигит-қизлар борлигига ишонаман!», — дея сўзини давом эттирди давлат раҳбари.
Шу муносабат Президент томонидан Давлат хизматини ривожлантириш агентлиги ва Ёшлар иттифоқига ушбу янги институтнинг фаолиятини ташкил этиш ва ваколатини белгилаш юзасидан бир ой муддатда аниқ таклиф киритиш топшириғи берилган.
Изоҳ (0)