Toshkent shahar Sergeli tumani 7A-mavze 8—9-qurilish maydonlari hududida barpo etilgan xonadonlar turli sohalarda muvaffaqiyatlarga erishayotgan 168 ta yosh oilaga tantanali topshirildi. Bu haqda Yoshlar media markazi “Daryo”ga xabar berdi.
Tashkil etilgan tadbirda tegishli davlat va jamoat tashkilotlari vakillari, yoshlar va ularning ota-onalari, keksa otaxon va onaxonlar, O‘zbekiston yoshlar ittifoqi Toshkent shahar Kengashi faollari qatnashdi.
O‘zbekiston Respublikasi Vazirlar Mahkamasining 2017-yil 23-sentabrdagi “Mamlakat ijtimoiy hayotida faol ishtirok etayotgan yosh oilalarni uy-joy bilan ta’minlashni qo‘llab-quvvatlashga doir qo‘shimcha chora-tadbirlar to‘g‘risida”gi 753-sonli qarori asosida jamiyatning ijtimoiy hayotida faol qatnashib kelayotgan yosh oilalarga imtiyozli ravishda uy-joylarning topshirilayotgani oila poydevorini mustahkamlash borasidagi xayrli amallardan biri bo‘ldi, deyiladi xabarda.
Mazkur qarorga asosan O‘zbekiston yoshlar ittifoqi Toshkent shahar Kengashining mahalliy Kengashlariga murojaat qilgan nomzodlarning hujjatlari tegishli tartibda hududiy hamda Respublika komissiyalari tomonidan o‘rganib chiqilib, ular orasidan uy-joyga muhtoj bir guruh yoshlarga imtiyozli asosda uylar berilishi belgilangan edi.
“Yoshlar uylari” 20 yil muddatga imtiyozli ipoteka krediti asosida berildi. Yangi uylar ikki va uch xonali bo‘lib, bu yerda yosh oilalarning to‘kin, farovon hayot kechirishi uchun barcha sharoitlar yaratilgan. Farzandlari uchun zamonaviy o‘yin maydonchalari ham qurilgan. Ushbu uylar barcha talablarga javob beradigan, yetarli qulayliklarga ega. Tabiiy gaz, issiq va sovuq suv, telefon aloqasi hamda elektr energiyasi bilan to‘liq va uzluksiz ta’minlangan. Yangi uyga ega bo‘lgan yosh oilalar vakillarining quvonchi cheksiz, deyiladi xabarda.
“2011-yildan buyon televideniyeda jurnalist sifatida samarali faoliyat yuritib kelyapman. Shu kunga qadar oilamiz bilan ijarada yashab keldik. Rahbariyat mehnatlarimni qo‘llab-quvvatlab uy olish uchun ijobiy tavsiyanoma berdi. Turmush o‘rtog‘im bilan ikki farzandni tarbiyalab, kamolga yetkazyapmiz. Bu uy biz uchun Yangi yilga munosib tuhfa va baxtli kunlarimizning debochasi bo‘ldi. Bayram arafasida yangi uyga ko‘chib o‘tayotganimizdan behad shodmiz”, — deydi Umida Xo‘jaqulova.
“Yoshlar uylari”ning imtiyozli kredit asosida, boshlang‘ich to‘lovlarsiz berilayotgani yosh oilalar uchun katta imkoniyatdir. Bunda uylarning boshlang‘ich 25 foiz badal pullari keyinchalik kreditni qaytarish muddati ya’ni 20 yil davomida bo‘lib-bo‘lib qaytarib berish sharti bilan O‘zbekiston Yoshlar ittifoqi tomonidan to‘lab beriladi. Bugungi kun holatiga jami 45,7 milliard so‘m miqdoridagi mablag‘lar yoshlar uchun to‘lab berildi.
Izoh (0)