O‘zbekistonda 1-yanvardan Markaziy bankning asosiy stavkasi va foiz koridori joriy etiladi

O‘zbekiston Respublikasi Markaziy bankining Boshqaruvi qarori bilan 2020-yil 1-yanvardan boshlab pul-kredit operatsiyalari bo‘yicha Markaziy bankning asosiy stavkasi va foiz koridori joriy etiladi. Bu haqda bank tomonidan ma’lum qilindi.

Bunda asosiy foiz stavka qayta moliyalash stavkasining joriy ko‘rsatkichi — 16 foiz va foiz koridori ± 1 foiz darajasida belgilandi.

Ma’lum qilinishicha, Markaziy bankning qayta moliyalash stavkasi amaliyotda o‘z kuchini saqlab qoladi hamda qonunchilikda ko‘rsatib o‘tilgan, shuningdek, boshqa holatlarda uning miqdori asosiy stavkaga teng darajada qabul qilinadi.

Markaziy bankning operatsion maqsadi asosiy stavka hamda pul-kredit operatsiyalari yordamida banklararo pul bozori foiz stavkalarini samarali boshqarish hamda uning belgilangan foiz koridori doirasida bo‘lishini ta’minlash hisoblanadi.

Qayd etilishicha, pul bozori foiz stavkalarining keskin tebranishlarining oldini olish, ularning o‘rnatilayotgan foiz koridori doirasida yoki asosiy foiz stavkasiga yaqin darajada shakllanishini ta’minlash maqsadida Markaziy bank tomonidan quyidagi pul-kredit operatsiyalaridan foydalaniladi:

• doimiy tusdagi bir kunlik (“overnayt”) valyutaviy SVOP va REPO operatsiyalari, o‘zgarmas foiz stavkada taqdim etiladi hamda foiz koridorining yuqori chegarasini (asosiy stavka + 1 foiz band) belgilab beradi;
• doimiy tusdagi bir kunlik (“overnayt”) depozit operatsiyalari, o‘zgarmas foiz stavkada taqdim etiladi va foiz koridorining quyi chegarasini (asosiy stavka - 1 foiz band) belgilab beradi;
• 2 haftagacha muddatga ega bo‘lgan valyutaviy SVOP, REPO va depozit auksionlari, ular bo‘yicha foiz stavkalar Markaziy bankning asosiy stavkasiga yaqin darajada shakllanadi;
• bank tizimidagi likvidlikning tarkibiy profitsitini tartibga solish hamda tijorat banklariga likvidlik berish operatsiyalari bo‘yicha garov ta’minoti bazasini shakllantirish maqsadida qisqa muddatli (uch va olti oylik) Markaziy bank obligatsiyalarini muomalaga chiqarish hamda auksion savdolari orqali tijorat banklariga joylashtirish rejalashtirilgan.

Markaziy bankning asosiy stavkasi va foiz koridori joriy etish O‘zbekiston “Inflyatsion targetlash rejimiga bosqichma-bosqich o‘tish orqali pul-kredit siyosatini takomillashtirish to‘g‘risida”gi farmonida belgilangan edi.