Toshkentdagi Ginekologiya markazida o‘rta maxsus ma’lumotli buxgalter bosh hisobchilik qilgan. Uning turmush o‘rtog‘i vazirlikda ishlashi aytildi

Korrupsiyaga qarshi kurashish bo‘yicha Respublika idoralararo komissiyasining 25-dekabr kuni bo‘lib o‘tgan kengaytirilgan yig‘ilishida bosh prokuror Nig‘matilla Yo‘ldoshev sog‘liqni saqlash tizimidagi qarindosh-urug‘chilik va davlat byudjetini talon-taroj qilish holatlarini keskin tanqid ostiga oldi, deya xabar bermoqda “Daryo” muxbiri Mirolim Isajonov.

Vazirlik tizimida qarindosh-urug‘chilik, tanish-bilishchilik avj olib, korrupsiya tom ma’noda ildiz otgan, desak ayni haqiqatni aytgan bo‘lamiz. Vazirlikning “Tibbiyot qurilish” injiniring korxonasi bosh hisobchisi Siddiqov byudjet pulini talon-taroj qilgan.

U qaynukasi, qaynsinglisi va jiyani rahbarligidagi korxonalarga tibbiy muassasalarda amalda bajarilmagan qurilish ishlari, ko‘rsatilmagan xizmatlar uchun hamda moliyaviy yordam vaji bilan 2,3 milliard so‘m pulni o‘tkazib, mablag‘larni o‘zlashtirgan.

Nig‘matilla Yo‘ldoshev, bosh prokuror

Ushbu holat yuzasidan jinoyat ishi qo‘zg‘atilib, tergov harakatlari boshlanganidan buyon bugungacha — qisqa vaqt ichida — bir milliard so‘mdan ortiq yetkazilgan zarar qoplangan. Bosh prokurorning qayd etishicha, bunday korrupsiya, talon-toroj holatlariga vazirlik ham, byudjet nazoratiga mas’ul idoralar ham “ko‘z yumib”, sukut saqlashni ma’qul ko‘rgan. “Kim bu ishlarga aralashgan yoki rahnamolik qilgan bo‘lsa, tergov jarayonida barchasining javobgarlik masalasi, albatta, hal qilinadi”, — dedi Yo‘ldoshev.

Eng qizig‘i, Respublika ixtisoslashtirilgan akusherlik va ginekologiya ilmiy-amaliy markazi bosh hisobchisining ma’lumoti oliy emas, o‘rta maxsus, to‘g‘rimi? Alisher aka (Shodmonov — sog‘liqni saqlash vaziri), shundaymi? Shunday bo‘lishi mumkinmi? Kimning ishi bu? Shunday markazga, shunday pul aylanmasi bo‘ladigan joyga boshqa kadr topilmadimi?

Mo‘ynoqda bo‘lganida ham tushunardim, Xonobodda bo‘lsa ham tushunardim. Poytaxtda, Ginekologiya markazida, shuncha katta mablag‘ aylanadigan joyda qanday qilib o‘rta maxsus ma’lumotli buxgalterni ushlab o‘tiribsiz? Turmush o‘rtog‘i vazirlikda, oilasi bu markazda. Buni qanday tushunish kerak?

Nig‘matilla Yo‘ldoshev, bosh prokuror

Avvalroq oktabr—noyabr oylarida Bosh prokuratura huzuridagi Departament tomonidan Respublika ixtisoslashtirilgan akusherlik va ginekologiya ilmiy-amaliy markazida tekshiruv o‘tkazilgani, markazning ayrim mansabdorlari 15,3 milliard so‘mni o‘zlashtirgani, ushbu holat yuzasidan jinoyat ishi qo‘zg‘atilib, besh kishi qamoqqa olingani ma’lum bo‘lgan edi.Markaz xodimlarining “Daryo”ga ma’lum qilishicha, Departament tekshiruvlaridan so‘ng pullik xizmat ko‘rsatib ishlovchi xodimlarning maoshi sezilarli oshgan. Xususan, UTT vrachi Nodira Umarova tekshiruvgacha 1,5—1,8 million so‘m atrofida maosh olgan bo‘lsa, tekshiruvdan so‘ng maoshi salkam 15 million so‘mga yetgan.