Davlat xavfsizlik xizmati (DXX) tomonidan boshqa vakolatli organlar bilan hamkorlikda giyohvandlik vositalari va psixotrop moddalar noqonuniy aylanmasiga qarshi kurash bo‘yicha tadbirlar faol davom ettirilmoqda.
DXXning Andijon viloyati boshqarmasi va viloyat IIB hamkorligida Andijon shahrining Mangulik ko‘chasida noqonuniy faoliyat ko‘rsatayotgan “dori bozori”da tezkor tadbir o‘tkazilgan.
Tadbir davomida muqaddam psixotrop moddalar savdosi bilan ayblanib, sudlangan fuqarolar — M.O. va A.N.dan 15 turdagi jami 578 dona narkotik va psixofaol dori vositalar ashyoviy dalil sifatida olingan.
“Holat yuzasidan Jinoyat kodeksining tegishli moddalariga asosan jinoyat ishi qo‘zg‘atilgan, tergov harakatlari olib borilmoqda”, — deya ma’lum qildi manba.
Ma’lumot uchun, Vazirlar Mahkamasining 2018-yil oktabrdagi qarori bilan “Lirika” “Muomalada bo‘lishi taqiqlangan va cheklangan giyohvandlik vositalari, psixotrop moddalar va prekursorlar ro‘yxati”ga kiritilgan.Undan avvalroq giyohvandlik vositalarining analoglari — yuqorida ko‘rsatilgan ro‘yxatda rasman mavjud bo‘lmagan, biroq inson ruhiyatiga shunga o‘xshash ta’sir ko‘rsatuvchi moddalarning noqonuniy muomalasi uchun jinoiy javobgarlik joriy etilgan edi.
Izoh (0)