Тошкентдаги Гинекология марказида ўрта махсус маълумотли бухгалтер бош ҳисобчилик қилган. Унинг турмуш ўртоғи вазирликда ишлаши айтилди

Коррупцияга қарши курашиш бўйича Республика идоралараро комиссиясининг 25 декабрь куни бўлиб ўтган кенгайтирилган йиғилишида бош прокурор Ниғматилла Йўлдошев соғлиқни сақлаш тизимидаги қариндош-уруғчилик ва давлат бюджетини талон-тарож қилиш ҳолатларини кескин танқид остига олди, дея хабар бермоқда «Дарё» мухбири Миролим Исажонов.

Вазирлик тизимида қариндош-уруғчилик, таниш-билишчилик авж олиб, коррупция том маънода илдиз отган, десак айни ҳақиқатни айтган бўламиз. Вазирликнинг «Тиббиёт қурилиш» инжиниринг корхонаси бош ҳисобчиси Сиддиқов бюджет пулини талон-тарож қилган.

У қайнукаси, қайнсинглиси ва жияни раҳбарлигидаги корхоналарга тиббий муассасаларда амалда бажарилмаган қурилиш ишлари, кўрсатилмаган хизматлар учун ҳамда молиявий ёрдам важи билан 2,3 миллиард сўм пулни ўтказиб, маблағларни ўзлаштирган.

Ниғматилла Йўлдошев, бош прокурор

Ушбу ҳолат юзасидан жиноят иши қўзғатилиб, тергов ҳаракатлари бошланганидан буён бугунгача — қисқа вақт ичида — бир миллиард сўмдан ортиқ етказилган зарар қопланган. Бош прокурорнинг қайд этишича, бундай коррупция, талон-торож ҳолатларига вазирлик ҳам, бюджет назоратига масъул идоралар ҳам «кўз юмиб», сукут сақлашни маъқул кўрган. «Ким бу ишларга аралашган ёки раҳнамолик қилган бўлса, тергов жараёнида барчасининг жавобгарлик масаласи, албатта, ҳал қилинади», — деди Йўлдошев.

Энг қизиғи, Республика ихтисослаштирилган акушерлик ва гинекология илмий-амалий маркази бош ҳисобчисининг маълумоти олий эмас, ўрта махсус, тўғрими? Алишер ака (Шодмонов — соғлиқни сақлаш вазири), шундайми? Шундай бўлиши мумкинми? Кимнинг иши бу? Шундай марказга, шундай пул айланмаси бўладиган жойга бошқа кадр топилмадими?

Мўйноқда бўлганида ҳам тушунардим, Хонободда бўлса ҳам тушунардим. Пойтахтда, Гинекология марказида, шунча катта маблағ айланадиган жойда қандай қилиб ўрта махсус маълумотли бухгалтерни ушлаб ўтирибсиз? Турмуш ўртоғи вазирликда, оиласи бу марказда. Буни қандай тушуниш керак?

Ниғматилла Йўлдошев, бош прокурор

Аввалроқ октябрь—ноябрь ойларида Бош прокуратура ҳузуридаги Департамент томонидан Республика ихтисослаштирилган акушерлик ва гинекология илмий-амалий марказида текширув ўтказилгани, марказнинг айрим мансабдорлари 15,3 миллиард сўмни ўзлаштиргани, ушбу ҳолат юзасидан жиноят иши қўзғатилиб, беш киши қамоққа олингани маълум бўлган эди.Марказ ходимларининг «Дарё»га маълум қилишича, Департамент текширувларидан сўнг пуллик хизмат кўрсатиб ишловчи ходимларнинг маоши сезиларли ошган. Хусусан, УТТ врачи Нодира Умарова текширувгача 1,5—1,8 миллион сўм атрофида маош олган бўлса, текширувдан сўнг маоши салкам 15 миллион сўмга етган.