Toshkentdagi Respublika ixtisoslashtirilgan akusherlik va ginekologiya ilmiy-amaliy markazida pullik xizmat ko‘rsatuvchi shifokorlarning oylik maoshi 1,5—1,8 million so‘mdan 10—15 million so‘mgacha ko‘tarildi. Bu haqda markaz UTT shifokori Nodira Umarova “Daryo” muxbiri Mirolim Isajonovga bergan intervyusida ma’lum qildi.
25-dekabr kuni Bosh prokuraturada O‘zbekiston bosh prokurori Nig‘matilla Yo‘ldoshev raisligida Korrupsiyaga qarshi kurashish bo‘yicha Respublika idoralararo komissiyasining kengaytirilgan yig‘ilishi bo‘lib o‘tdi. Yig‘ilishda Respublika ixtisoslashtirilgan akusherlik va ginekologiya ilmiy-amaliy markazida o‘tkazilgan tekshiruv haqida so‘z bordi.
Yo‘ldoshevning ta’kidlashicha, markazning ayrim mansabdorlari 12 kishi bilan jinoiy til biriktirib (ular orasida bank xodimlari ham bo‘lgan), 15,3 milliard so‘mni o‘zlashtirgan. “Pullik xizmatdan tushgan 13,2 milliard so‘m bankka topshirilmay, 1,1 milliard so‘m xodimlarning ish haqlari g‘aznadan ochiqdan-ochiq o‘zlashtirilgan”, — dedi bosh prokuror.
Shuningdek, amalda ko‘rsatilmagan xizmatlar hamda yetkazib berilmagan jihozlar uchun 636 million so‘m o‘tkazilib, mablag‘lar talon-toroj qilingan. Bosh prokuror Nig‘matilla Yo‘ldoshevning ma’lum qilishicha, hozirda ushbu holatlar yuzasidan jinoyat ishi qo‘zg‘atilib, 5 kishi qamoqqa olingan.
Yig‘ilishdan so‘ng “Daryo” muxbiriga intervyu bergan markaz shifokori Nodira Umarova prokuratura tekshiruvidan so‘ng maoshi bir necha barobarga oshganini tasdiqladi.
“Oktabr—noyabr oylarida huquq-tartibot organlari xodimlari tomonidan markazimizda o‘tkazilgan tekshiruv ishlaridan so‘ng, haqiqatan ham, pullik xizmat ko‘rsatadigan vrachlar maoshi 4—5 baravar oshirildi. Tekshiruvgacha 1,8 million so‘m atrofida maosh olardim. Hozir esa oyligim 15 million so‘m atrofida”, — dedi u.
Yig‘ilishda so‘zga chiqqan senator Zayniddin Nizomxo‘jayev ushbu tartibni boshqa ixtisoslashtirilgan markazlarda ham joriy etish taklifini bildirdi.
“Akusherlik va ginekologiya markazi vrachlarining maoshi oshirilgani haqida xabar OAVlarda yoritilgach, boshqa ixtisoslashtirilgan markaz xodimlari ham maoshlari oshirilishini talab qiladi. Bu tartib bo‘yicha normativ-huquqiy hujjat ishlab chiqilishini Moliya vazirligidan so‘rab qolardim”, — dedi senator.
Nizomxo‘jayevning qo‘shimcha qilishicha, Akusherlik va ginekologiya markazi misolida yana 16 ta ixtisoslashtirilgan markazlarda bu tartibni joriy etib, tegishli nizomni tayyorlash kerak, chunki boshqa markazlarda ham pullik xizmat ko‘rsatish yo‘lga qo‘yilgan.
Izoh (0)