Тошкентдаги Республика ихтисослаштирилган акушерлик ва гинекология илмий-амалий марказида пуллик хизмат кўрсатувчи шифокорларнинг ойлик маоши 1,5—1,8 миллион сўмдан 10—15 миллион сўмгача кўтарилди. Бу ҳақда марказ УТТ шифокори Нодира Умарова «Дарё» мухбири Миролим Исажоновга берган интервьюсида маълум қилди.
25 декабрь куни Бош прокуратурада Ўзбекистон бош прокурори Ниғматилла Йўлдошев раислигида Коррупцияга қарши курашиш бўйича Республика идоралараро комиссиясининг кенгайтирилган йиғилиши бўлиб ўтди. Йиғилишда Республика ихтисослаштирилган акушерлик ва гинекология илмий-амалий марказида ўтказилган текширув ҳақида сўз борди.
Йўлдошевнинг таъкидлашича, марказнинг айрим мансабдорлари 12 киши билан жиноий тил бириктириб (улар орасида банк ходимлари ҳам бўлган), 15,3 миллиард сўмни ўзлаштирган. «Пуллик хизматдан тушган 13,2 миллиард сўм банкка топширилмай, 1,1 миллиард сўм ходимларнинг иш ҳақлари ғазнадан очиқдан-очиқ ўзлаштирилган», — деди бош прокурор.
Шунингдек, амалда кўрсатилмаган хизматлар ҳамда етказиб берилмаган жиҳозлар учун 636 миллион сўм ўтказилиб, маблағлар талон-торож қилинган. Бош прокурор Ниғматилла Йўлдошевнинг маълум қилишича, ҳозирда ушбу ҳолатлар юзасидан жиноят иши қўзғатилиб, 5 киши қамоққа олинган.
Йиғилишдан сўнг «Дарё» мухбирига интервью берган марказ шифокори Нодира Умарова прокуратура текширувидан сўнг маоши бир неча баробарга ошганини тасдиқлади.
«Октябрь—ноябрь ойларида ҳуқуқ-тартибот органлари ходимлари томонидан марказимизда ўтказилган текширув ишларидан сўнг, ҳақиқатан ҳам, пуллик хизмат кўрсатадиган врачлар маоши 4—5 баравар оширилди. Текширувгача 1,8 миллион сўм атрофида маош олардим. Ҳозир эса ойлигим 15 миллион сўм атрофида», — деди у.
Йиғилишда сўзга чиққан сенатор Зайниддин Низомхўжаев ушбу тартибни бошқа ихтисослаштирилган марказларда ҳам жорий этиш таклифини билдирди.
«Акушерлик ва гинекология маркази врачларининг маоши оширилгани ҳақида хабар ОАВларда ёритилгач, бошқа ихтисослаштирилган марказ ходимлари ҳам маошлари оширилишини талаб қилади. Бу тартиб бўйича норматив-ҳуқуқий ҳужжат ишлаб чиқилишини Молия вазирлигидан сўраб қолардим», — деди сенатор.
Низомхўжаевнинг қўшимча қилишича, Акушерлик ва гинекология маркази мисолида яна 16 та ихтисослаштирилган марказларда бу тартибни жорий этиб, тегишли низомни тайёрлаш керак, чунки бошқа марказларда ҳам пуллик хизмат кўрсатиш йўлга қўйилган.
Изоҳ (0)