O‘zbekistonda mehmonxona qurgan tadbirkorga davlat tomonidan ilk bor 4 080 000 000 so‘mlik subsidiya berildi. Bu haqda Turizmni rivojlantirish qo‘mitasi matbuot xizmati xabar bermoqda.
Sertifikat 21-dekabr kuni “Amirsoy” tog‘-chang‘i kurortining tantanali ochilish marosimi doirasida Bosh vazir o‘rinbosari Aziz Abduhakimov tomonidan Samarqanddagi “Grand Hotel Sogdiana” mehmonxonasi egasiga topshirildi.
Hukumatning 2019-yil 27-maydagi “Mehmonxona xo‘jaligi faoliyatini yanada rivojlantirish uchun qulay shart-sharoitlar yaratish chora-tadbirlari to‘g‘risida”gi 433-sonli qaroriga binoan investorlarga yangi qurilgan mehmonxona 3 yulduz toifasiga va 50 xonadan kam bo‘lmagan xonalar fondiga ega yoki 4 yulduz toifasiga va 100 xonadan kam bo‘lmagan xonalar fondiga ega bo‘lganda davlat budjetidan subsidiya ajratiladi. Bunda yangi qurilgan mehmonxona 2022-yilning 1-yanvariga qadar foydalanishga topshirilishi lozim.
Investorlarga subsidiya 1 marotaba ajratiladi. Uning miqdori kelgusi yil uchun davlat budjeti parametrlarini tasdiqlash jarayonida ushbu miqdorni har yili indeksatsiya qilgan holda 3 yulduz toifasiga ega mehmonxonalardagi har bir xona uchun 40 million so‘mni, 4 yulduz toifasiga ega mehmonxonalardagi har bir xona uchun 65 million so‘mni tashkil etadi.
“Grand Hotel Sogdiana” mehmonxonasiga 3 yulduz toifasi berilgan. Mehmonxona “Dobusiya Samarqand Aqualand” MChJga tegishli bo‘lib, u yerda 204 nafar mijozga mo‘ljallangan 102 ta nomer mavjud. Mehmonxona qurilishi 2017-yil avgustida boshlangan, joriy yil sentabrida esa foydalanishga topshirilgan.
Izoh (0)