Respublika miqyosida o‘tkazib kelinayotgan “Eng kitobxon maktab” loyihasining Qashqadaryodagi g‘olibi — Koson tuman xalq ta’limi bo‘limiga Nexia-3 avtomobili topshirildi, — deya xabar beradi “Daryo” muxbiri.
Ma’lum bo‘lishicha, “Kitob dunyosi tarmoq savdo markazi” tomonidan tashkil etilgan loyiha viloyatda 100 kun davom etgan bo‘lib, shu fursat davomida 350 ming dona kitob sotilgan. Xarid qilingan kitoblarning 75 mingtasi kosonlik kitobxonlar tomonidan sotib olingan.
— Mazkur loyihamiz respublika bo‘ylab o‘tkazilishi mo‘ljallangan bo‘lib, birinchi bosqichini 100 kun deganda yakunladik, — deydi loyiha rahbari Shuhratjon Ohunjanov. – Nasib etsa boshqa viloyatlarda ham davom etayotgan loyihamizning g‘oliblariga avtomobil sovg‘a qilishni niyat qilganmiz.
Ma’lumot o‘rnida: “Eng kitobxon maktab” loyihasida 2-o‘rin Yakkabog‘ tuman xalq ta’limi bo‘limiga nasib etgan bo‘lsa, 3-o‘rin Mirishkor tuman xalq ta’limi bo‘limiga berildi.
Eslatib o‘tamiz, Toshkent shahrida bo‘lib o‘tgan “Yosh kitobxon” ko‘rik-tanlovining respublika bosqichida Koson tumanidagi 15-maktabning ona tili va adabiyot fani o‘qituvchisi Surayyo Shodiyeva 20-30 yoshlilar orasida 1-o‘rinni egallab, Prezident sovg‘asi – Spark avtomobili bilan taqdirlangandi.
Izoh (0)