АҚШнинг CNN Travel нашри Ўзбекистоннинг сўнгги йилларда саёҳат учун энг муносиб давлатлар қаторидан жой олаётганига изоҳ берди. Бу ҳақда Туризмни ривожлантириш давлат қўмитаси хабар қилди.
Нашр томонидан қайд этилишича, Ўзбекистон маданий ва тарихий жиҳатдан жозибали мамлакат бўлиб, осон кириш ва визасиз саёҳат қилиш имконияти туфайли Lonely Planet сайёҳлик веб-сайти томонидан янги йил учун биринчи рақамли саёҳатлар минтақаси дея топилган.
Таъкидланишича, The Economist нашри ҳам мамлакатни алоҳида таърифлаб, ўтган йили ҳукумат томонидан жадал суръатлар билан амалга оширилган ислоҳотлари туфайли Ўзбекистонни 2019 йилнинг энг тезкор ривожланаётган мамлакат сифатида қайд этди. Шуларнинг бари ҳамда унинг етарлича кашф қилинмаган тарихи ва ажойиб таомлари Ўзбекистонни тобора оммалашиб бораётган саёҳатбоп манзилга айлантирмоқда.
Муаллифнинг таъкидлашича, Ўзбекистон визасиз саёҳат қилиш имкони, хавфсизлиги, бой тарихи, ижтимоий тармоқларда оммалашиб бораётгани ва албатта, мазали миллий таомлари билан 2020 йилда саёҳат қилиш учун энг муносиб ўлка ҳисобланади.
Таъкидланишича, хавфсизлик жиҳатидан ҳам Ўзбекистон ижобий баҳоланиб, мамлакатга ташриф буюрувчи хорижликлар сони тобора ошиб бораётгани қайд этилган. Шунингдек, Марказий Осиё, хусусан, Ўзбекистоннинг энг жозибали сифати минглар йиллар давомида сақланиб келинган тарихи эканлигига алоҳида тўхталиб ўтилган.
«UNESCO маданий мерос объектлари учун маданий ва тарихий аҳамиятга эга бўлган жойлар ва йўналишларни белгилаб беради. Ўзбекистондан бу рўйхатга Бухоро, Самарқанд, Хива ва Шаҳрисабз шаҳарлари киритилган», — дейилади нашр изоҳида.
Бундан ташқари, CNN мақоласида сўнгги йилларда ижтимоий тармоқларда ғарб саёҳатчилари пост улашишлари орқали мамлакат ва унинг диққатга сазовор жойлари фаол тарғиб қилинаётгани таъкидланиб, уларда #VisitUzbekistan, #VisitTashkent, #VisitSamarkand ва #TravelCentralAsia каби ҳештеглар кенг тарқалаётганига эътибор қаратилган.
Ўзбекистоннинг миллий ошхонаси ҳақида гап кетар экан, аксарият таомларнинг хамир ва гуручдан тайёрланиши қайд этилган. «Уларнинг энг машҳур таоми ўзбек паловидир, таркиби сабзи, гуруч, пиёз, гўшт ва гуручдан иборат», — дейилади нашрда. Шу ўринда сўнгги вақтларда озиқ-овқат блогерларининг Ўзбекистонга ташрифи ва унинг гастрономик туризм салоҳиятини тарғиб қилаётганлиги ҳақида сўз юритилган.
Изоҳ (0)