“O‘zbekiston temir yo‘llari” AJ yangi metro bekatlarining 28-dekabrda foydalanishga topshirilmasligini bildirdi

“O‘zbekiston temir yo‘llari” AJ Axborot-tahlil media-markazi Toshkent shahridagi Sergeli metro yo‘nalishidagi qurilish ishlari va Yunusobod yo‘li qurilishining ikkinchi bosqichi davom etayotgani, obyektlar loyihasi amalga oshirish rejasi, qurilish normalari va texnik talablar asosida foydalanishga topshirilishini, shuningdek, ayrim ommaviy axborot vositalari xabar berganidek 28-dekabrda ochilmasligini ma’lum qildi.

Xabarga ko‘ra, qurilish ishlari ketayotgan hududlarda qurilish texnikalarining ko‘payishi, yog‘ingarchiliksiz, havo ochiq bo‘lgan kunlarda ishni to‘g‘ri tashkil etish bilan bog‘liq.

Eslatib o‘tamiz, 19-dekabr, payshanba kuni Yunusobod yo‘lining Turkiston bekati qurilayotgan hududda yer o‘pirilishi yuz bergan, bir necha kishi tuproq ostida qolib ketgani taxmin qilingan. Keyinchalik, Sog‘liqni saqlash va favqulodda vaziyatlar vazirliklari avariya yuzasidan qo‘shimcha ma’lumot berib, talafot ko‘rganlar va jabrlanganlar yuzasidan aniqlik kiritilayotgani hamda sodir bo‘lgan holatning sabablari o‘rganilayotganini bildirgan. Vazirlar Mahkamasining farmoyishi bilan Toshkent metropoliteni Yunusobod yo‘nalishining qurilayotgan qismida sodir bo‘lgan hodisa sabablari va oqibatlarini o‘rganish hamda zudlik bilan bartaraf qilish bo‘yicha hukumat komissiyasi tuzilgan. Qidiruv-qutqaruv ishlari davomida jami 6 nafar quruvchining jasadi tunnel ostidan olib chiqilgan, halok bo‘lganlarning oilalariga 100 million so‘mdan kompensatsiya to‘lab berilgan.