O‘zbekistonda eski namunadagi haydovchilik guvohnomasini yangisiga almashtirish 2020-yilning 31-dekabrigacha amalga oshiriladi. Bu haqda Davlat xizmatlari agentligi Toshkent shahar boshqarmasi eslatdi.
Vazirlar Mahkamasining 2017-yil 2-martdagi “Milliy haydovchilik guvohnomasining hamda avtomototransport vositasi ro‘yxatdan o‘tkazilganligi to‘g‘risidagi guvohnomaning yangi namunalarini joriy etish chora-tadbirlari to‘g‘risida”gi qaroriga ko‘ra, eski namunadagi haydovchilik guvohnomasini yangi namunadagi milliy haydovchilik guvohnomasiga almashtirishning so‘nggi muddati etib 2020-yilning 31-dekabri belgilangan.
Haydovchilik guvohnomalarini Davlat xizmatlari markazlari orqali yangi namunadagisiga almashtirish mumkin.
Milliy haydovchilik guvohnomalarini yangi namunasiga almashtirish uchun haydovchilar pasport va eski namunadagi haydovchilik guvohnomasi hamda uning talonini taqdim etishi kerak bo‘ladi.
Eski namunadagi milliy haydovchilik guvohnomalari hamda avtomototransport vositasi ro‘yxatdan o‘tkazilganligi to‘g‘risidagi guvohnomalar 2021-yil 1-yanvardan boshlab haqiqiy emas deb hisoblanadi.
Qayd etilishicha, bugungi kunda Toshkent shahrining Mirzo Ulug‘bek, Mirobod, Uchtepa, Shayxontohur, Yunusobod, Yakkasaroy, Yashnobod tumanidagi Davlat xizmatlari markazlari orqali ushbu davlat xizmati amalga oshirilmoqda.
Izoh (0)