Umumiy ovqatlanish korxonalari va ta’lim tizimida Sog‘liqni saqlash vazirligining aholi sanitariya-epidemiologik osoyishtaligini saqlash bo‘yicha ishlari sezilmayapti. Bu haqda O‘zbekiston Senati Kengashining 24-dekabr kuni bo‘lib o‘tgan kengaytirilgan yig‘ilishida Senat raisi Tanzila Norboyeva aytib o‘tdi, deya xabar bermoqda “Daryo” muxbiri Musulmonbek Ibrohimov.
Kengash kun tartibi doirasida umumiy ovqatlanish korxonalari va ta’lim tizimida aholining sanitariya-epidemiologik osoyishtaligiga oid qonun hujjatlarining ijrosini o‘rganish natijalarini ko‘rib chiqildi. Yig‘ilishda Tanzila Norboyeva Sog‘liqni saqlash vazirligi huzuridagi Sanitariya-epidemiologik osoyishtalik agentligi direktori Bahrom Almatov chiqishidan qoniqmaganligini va aniq takliflar bildirishini so‘radi.
Sog‘liqni saqlash vaziri va uning o‘rinbosarining masalaga munosabati mana shu. Shuning uchun ham hamma joyda odamlar ovqatdan zaharlanib, 50 foizdan ortiq bolalar kamqonlik kasaliga chalinmoqda. Bu bilan sog‘liqni saqlash vazirining ishi yo‘q.Odam o‘lsa o‘lib yotibdi, zaharlansa zaharlansin, kamqon bolalar tug‘ilaversin. Lekin bu yerda hech qanday mas’uliyat yo‘q. Aslida bu Sog‘liqni saqlash vazirligining masalasi. Qanday qilib bunday sovuqqonlik bilan yondashish mumkin, bilmayman. Agentlikning ahvoli ham mana — kelib, ma’ruza o‘qib beryapti. Odam qanday qilib ovqatdan zaharlanishini aytib beryapti — bizga bu nimaga kerak?
Agentlik davlat miqyosida tashkil etildi. Ertaga bu qanday natija beradi? Prezidentimiz bunday farmonni bejizga qabul qilmadilar. Bekorga bittasini Vazirlar Mahkamasi huzurida, yana birini Sog‘liqni saqlash huzurida tashkil qimadilar. Bu muammolarni keskin to‘xtatish uchun qilindi. Lekin bizda o‘zgarish bo‘layotgani yo‘q, muammolar davom etyapti. Kasallar, ularning murojaatlari, qayd etilganlari OAVga chiqib ketyapti. Ovqatdan zaharlanganlari qancha.
Aslida bu muammolarni jurnalistlar emas, sizlar bong urib, ko‘tarib chiqishingiz kerak. “Bu yerda ovqatlanish qoidalari buzilyapti”, “Tadbirkorlik subyektlari tashkil etilayotgani yaxshi, lekin ayrimlarning harakatlari zarar keltiryapti, natijada odamlarimizning salomatligiga putur yetyapti”, deb sizlar ko‘tarib chiqishingiz kerak.
Sizlar esa ko‘tarib chiqmayapsizlar, mana majlisga munosabat. Sog‘liqni saqlash vaziri nima uchun bugungi majlisga o‘zi va o‘rinbosarlari kelmagani haqida tushuntirish xati yozib bersin. Ish olib borayotganingiz ko‘ringani yo‘q. Istagan maktabga boringlar — tozalik bo‘lishi, ovqatlarni alohida-alohida saqlanishi, kerakli haroratda saqlanishi kabi masalar bilan hech kimni ishi yo‘q.
Bu masalani hech qachon nazoratdan olmaymiz. Bizdan keyingi parlamentga ham ushbu masalani yozib berib, ketamiz. Qolgan senatorlar saylansa ishlaydi, bo‘lmasam, yangi senatorlarga ham tavsiyalarimizni berib ketamiz, hal bo‘lmagunicha qo‘ymaymiz.
Bolalar salomatligining bunaqangi yomonlashuvi haqida, bilmayman, nima deyish mumkin. Sizlarga kelganda albatta davlat rahbari bu masala bilan shug‘ullanishi kerak, davlat rahbari aytsagina nimadir qilasizlar. Berilayotgan bu signallar, OAVdagi chiqishlarga e’tiborliroq bo‘linglar. Jimjit, sukunat. Ishingizda hech narsa sezilgani yo‘q. Hozir bu savollraga vazir javob berishi kerak edi.
Borib, vazirga “salomimiz”ni yetkazib qo‘ying. Masalaga “jiddiy” munosabatini tan oldik.
Tanzila Norboyeva, Senat raisi
Izoh (0)