YPX xodimlari 2020-yil 1-yanvardan boshlab mobil videokamera (bodikamera)dan foydalangan holda o‘z xizmat vazifasini olib boradi. Bu haqda 24 dekabr kuni Axborot va ommaviy kommunikatsiyalar agentligida o‘tkazilgan brifingda ma’lum qilindi, deya xabar bermoqda “Daryo” muxbiri Mirolim Isajonov.
Matbuot anjumanida ta’kidlanishicha, Xitoyning “Xaytera” kompaniyasidan 6 193 ta bodikameralar xarid qilingan. Shundan 200 donasi Qoraqalpog‘iston Respublikasiga, Toshkent shahriga 2 876 donasi, Andijon viloyatiga 187 donasi, Buxoro viloyatiga 212 donasi, Jizzax viloyatiga 188 donasi, Qashqadaryo viloyatiga 236 donasi, Navoiy viloyatiga 185 donasi, Namangan viloyatiga 184 donasi, Samarqand viloyatiga 341 donasi, Surxondaryo viloyatiga 203 donasi, Sirdaryo viloyatiga 183 donasi, Toshkent viloyatiga 432 donasi, Farg‘ona viloyatiga 289 donasi, Xorazm viloyatiga 191 dona ajratilib, 193 donasi zaxiraga olindi.
Bodikameralar uchun texnik topshiriq va dasturiy ta’minot ishlab chiqilib, tasdiqlangan. Texnik topshiriq talablariga javob berganlari sentabr—oktabr oylarida Toshkent shahrida test sinovlaridan o‘tkazildi va natijalar ijobiy baholandi.
Bodikameralar onlayn rejimda ishlab, xodim va fuqaro o‘rtasidagi barcha holatni boricha yozib oladi. U ertalab yoqiladi, xodimning xizmat vaqti tugagach esa o‘chadi. IIB vakili oshxonaga kirsa ham, o‘tirsa ham qurilmani o‘chirolmaydi. Agar xodim kamerani yechsa yoki uning oldini to‘sib qo‘ysa, o‘sha zahoti serverga bu haqda xabar yetib boradi.Qayd etilishicha, YPX inspektorlaridan tashqari, birinchi navbatda, Toshkent shahar IIBB PPX brigadasi, keyinroq esa boshqa hududlarning patrul-post xodimlari bodikameralar bilan ta’minlanadi.Kameraning bitta batareyasidagi quvvat 8 soatga yetadi. 24 soat mobaynida zaxiradagi batareyalar ham kamera samarali ishlashida asqotadi. Kamera 25—30 metr masofagacha bo‘lgan holatni yozib oladi va u bir oy saqlanadi. Bodikameraning bir donasi 400 dollar narxda xarid qilindi.
Mamlakat bo‘yicha server moslamalarini joylashtirish uchun 65 ta, bodikameralarni joylashtirishga 192 ta joy tayyorlandi. Bitta server 50 tadan 100 tagacha kamerani qamrab oladi. Ularni alohida dispetcherlar muntazam nazorat qilib boradi. Bodikameralarga tegishli dasturlar o‘rnatilib, kerakli miqdorda SIM-kartalar bilan ta’minlandi va himoyalangan VPN- kanallari orqali aloqa yo‘lga qo‘yildi.
Bodikameralar Markaziy Osiyo mamlakatlari orasida ilk bor O‘zbekistonda joriy qilinmoqda. Biz mazkur qurilmaning ishlab chiqarilishi, narxi va texnik xususiyatlarini o‘rganish maqsadida Xitoy, Germaniya, AQSh kabi davlatlarda bo‘ldik. Maqsad — sohamizda inson omilini kamaytirish, aholi va xodimlarimizni tartibga chaqirish, turli ko‘ngilsiz holatlarning oldini olishdir.
Azizbek Ikromov, ichki ishlar vaziri o‘rinbosari
O‘zbekistonda ichki ishlar organlari xodimlari bodi-kameralar bilan ishlay boshlashi haqida ilk bor 2017-yil 22-dekabrida aytilgan, muddat sifatida 2018-yilning 10-fevrali ko‘rsatilgan edi. Keyinchalik muddat 1-martga ko‘chdi, keyinroq sentabrda bo‘ladi, deyildi. 2018-yil dekabrida hukumat tomonidan qabul qilingan qarorda yangi muddat — 2019-yil 1-iyuli ko‘rsatildi.
2019-yil 3-iyulida esa hukumat bodi-kameralar bo‘yicha yangi qaror qabul qildi. Unga ko‘ra, ichki ishlar organlari xodimlarining bodi-kameradan foydalangan holda ishlashga o‘tish muddati 2020-yil 1-yanvargacha kechiktirildi. Bunga Mudofaa sanoati davlat qo‘mitasi va IIV rahbariyati tomonidan yo‘l qo‘yilgan ortiqcha sansolarlik va byurokratizm sabab bo‘lgan.
Izoh (0)