Yunusobodda metro qurilishidagi ekskavator sabab to‘qqizta mavze chiroqsiz qoldi

Toshkentning Yunusobod tumanidagi to‘qqizta — 2, 3, 11, 13, 14, 15, 17, 18 va 19-mavze va bitta — “Bobodehqon” mahallasi aholisi 23-dekabr oqshomi va 24-dekabr tongida elektr ta’minotisiz qoldi. Ushbu holat yuzasidan Toshkent shahar elektr tarmoqlari korxonasi tushuntirish berdi.

Ma’lum bo‘lishicha, 23-dekabr kuni soat taxminan 22:00 da “O‘zbekiston temir yo‘llari” kompaniyasining “Metroqurilish” korxonasi tomonidan Yunusobod tumanida ekskavator bilan yer qazish ishlari olib borilayotganida Toshkent shahar elektr tarmoqlari tasarrufidagi yuqori kuchlanishli kabellarga zarar yetkazilib, avariya sodir bo‘lgan.

Ta’kidlanishicha, Toshkent shahar elektr tarmoqlarining Yunusobod tuman elektr ta’minoti korxonasining maxsus tezkor brigada ishchi guruhi tomonidan avariya oqibatlarini bartaraf etish va elektr ta’minotini tiklash ishlari bo‘yicha choralar ko‘rilgan va hozirda tuman mavzelari elektr ta’minoti bilan ta’minlangan.

“Yuzaga kelgan noqulayliklar uchun uzr so‘raymiz”, — deyiladi Toshkent shahar elektr tarmoqlari korxonasi axborotida.