Navoiy viloyatida oktabr oyi boshlarida noma’lum shaxs 21 yoshli U.H.ning nomiga rasmiylashtirilgan plastik kartochkasi hisobidan yashirin ravishda pul o‘tkazish yo‘li bilan jami 4 523 000 so‘m pulini o‘g‘irlagan. IIV huzuridagi Tergov deparatmenti axborotiga ko‘ra, U.H. mazkur holat yuzasidan IIBga murojaat qilgan.
Holat yuzasidan Zarafshon shahar IIB huzuridagi Tergov bo‘limi tomonidan Jinoyat kodeksining 169-moddasi (o‘g‘irlik) 3-qismi “b” bandi bilan jinoyat ishi qo‘zg‘atilgan. “Dastlabki tergov jarayonida mazkur jinoyatni ‘Asaka bank’ Zarafshon shahar filiali ish o‘rganuvchisi 33 yoshli R.M. sodir etilganligi aniqlanib, ushlangan”, — deyiladi Tergov departamenti axborotida.
R.M. bank filialiga murojaat qilgan U.H.dan uning nomiga rasmiylashtirilgan, hisobida 6 000 000 so‘m pul bo‘lgan plastik kartochkasini naqd pul qilib berish uchun olib, ushbu plastik kartochkaga ustalik bilan o‘zining telefon raqamini “Oson” dasturi orqali ulashga erishgan. U 2019-yil 9—10-oktabr kunlari yashirin ravishda ushbu karta hisobidan bo‘lib-bo‘lib jami 4 523 000 so‘m miqdoridagi pullarni o‘tkazib olib, keyinchalik ularni o‘zlashtirgan.
“R.M.ga nisbatan shu modda bilan ayblov e’lon qilinib, garov ehtiyot chorasi qo‘llanilgan. Hozirda ushbu jinoyat ishi bo‘yicha dastlabki tergov harakatlari olib borilmoqda”, — deya qo‘shimcha qilingan Tergov departamenti axborotida.
Mavzuga doir:
“Asaka bank” gumon qilinuvchi R.M.ning ushbu bank tizimida ishlashini rad etdi
“Asaka bank” matbuot xizmatining xabar berishicha, 1986-yilda Buxoro viloyati G‘ijduvon tumanida tug‘ilgan R.M. bankning Zarafshon filialiga ishga kirish maqsadida 2019-yilning oktabr oyida bir necha marotaba kelib-ketib yurib, og‘zaki ravishda murojaat qilgan.“Fuqaro R.M. hech qachon ‘Asaka bank’ tizimida ishlamagan va hatto ish o‘rganuvchi sifatida rasmiylashtirilmagan. Uning amalga oshirgan firibarligiga ‘Asaka’ banki va xodimlarining hech qanday aloqasi yo‘q”, — deyiladi bank raddiyasi.
Ma’lumot uchun: O‘zbekiston Respublikasining “Ommaviy axborot vositalari to‘g‘risida”gi qonuni 40-moddasiga muvofiq, “bosh muharrir, shuningdek jurnalist ommaviy axborot vositalarida haqiqatga mos kelmaydigan materiallarni tarqatganlik uchun quyidagi hollarda javobgar bo‘lmaydi: agar bu ma’lumotlar rasmiy xabarlardan,.. davlat hokimiyati va boshqaruvi organlarining matbuot xizmatlari, shuningdek ularning rasmiy veb-saytlari orqali olingan bo‘lsa”.
Izoh (0)