Умумий овқатланиш корхоналари ва таълим тизимида Соғлиқни сақлаш вазирлигининг аҳоли санитария-эпидемиологик осойишталигини сақлаш бўйича ишлари сезилмаяпти. Бу ҳақда Ўзбекистон Сенати Кенгашининг 24 декабрь куни бўлиб ўтган кенгайтирилган йиғилишида Сенат раиси Танзила Норбоева айтиб ўтди, дея хабар бермоқда «Дарё» мухбири Мусулмонбек Иброҳимов.
Кенгаш кун тартиби доирасида умумий овқатланиш корхоналари ва таълим тизимида аҳолининг санитария-эпидемиологик осойишталигига оид қонун ҳужжатларининг ижросини ўрганиш натижаларини кўриб чиқилди. Йиғилишда Танзила Норбоева Соғлиқни сақлаш вазирлиги ҳузуридаги Санитария-эпидемиологик осойишталик агентлиги директори Баҳром Алматов чиқишидан қониқмаганлигини ва аниқ таклифлар билдиришини сўради.
Соғлиқни сақлаш вазири ва унинг ўринбосарининг масалага муносабати мана шу. Шунинг учун ҳам ҳамма жойда одамлар овқатдан заҳарланиб, 50 фоиздан ортиқ болалар камқонлик касалига чалинмоқда. Бу билан соғлиқни сақлаш вазирининг иши йўқ.Одам ўлса ўлиб ётибди, заҳарланса заҳарлансин, камқон болалар туғилаверсин. Лекин бу ерда ҳеч қандай масъулият йўқ. Аслида бу Соғлиқни сақлаш вазирлигининг масаласи. Қандай қилиб бундай совуққонлик билан ёндашиш мумкин, билмайман. Агентликнинг аҳволи ҳам мана — келиб, маъруза ўқиб беряпти. Одам қандай қилиб овқатдан заҳарланишини айтиб беряпти — бизга бу нимага керак?
Агентлик давлат миқёсида ташкил этилди. Эртага бу қандай натижа беради? Президентимиз бундай фармонни бежизга қабул қилмадилар. Бекорга биттасини Вазирлар Маҳкамаси ҳузурида, яна бирини Соғлиқни сақлаш ҳузурида ташкил қимадилар. Бу муаммоларни кескин тўхтатиш учун қилинди. Лекин бизда ўзгариш бўлаётгани йўқ, муаммолар давом этяпти. Касаллар, уларнинг мурожаатлари, қайд этилганлари ОАВга чиқиб кетяпти. Овқатдан заҳарланганлари қанча.
Аслида бу муаммоларни журналистлар эмас, сизлар бонг уриб, кўтариб чиқишингиз керак. «Бу ерда овқатланиш қоидалари бузиляпти», «Тадбиркорлик субъектлари ташкил этилаётгани яхши, лекин айримларнинг ҳаракатлари зарар келтиряпти, натижада одамларимизнинг саломатлигига путур етяпти», деб сизлар кўтариб чиқишингиз керак.
Сизлар эса кўтариб чиқмаяпсизлар, мана мажлисга муносабат. Соғлиқни сақлаш вазири нима учун бугунги мажлисга ўзи ва ўринбосарлари келмагани ҳақида тушунтириш хати ёзиб берсин. Иш олиб бораётганингиз кўрингани йўқ. Истаган мактабга боринглар — тозалик бўлиши, овқатларни алоҳида-алоҳида сақланиши, керакли ҳароратда сақланиши каби масалар билан ҳеч кимни иши йўқ.
Бу масалани ҳеч қачон назоратдан олмаймиз. Биздан кейинги парламентга ҳам ушбу масалани ёзиб бериб, кетамиз. Қолган сенаторлар сайланса ишлайди, бўлмасам, янги сенаторларга ҳам тавсияларимизни бериб кетамиз, ҳал бўлмагунича қўймаймиз.
Болалар саломатлигининг бунақанги ёмонлашуви ҳақида, билмайман, нима дейиш мумкин. Сизларга келганда албатта давлат раҳбари бу масала билан шуғулланиши керак, давлат раҳбари айтсагина нимадир қиласизлар. Берилаётган бу сигналлар, ОАВдаги чиқишларга эътиборлироқ бўлинглар. Жимжит, сукунат. Ишингизда ҳеч нарса сезилгани йўқ. Ҳозир бу саволлрага вазир жавоб бериши керак эди.
Бориб, вазирга «саломимиз»ни етказиб қўйинг. Масалага «жиддий» муносабатини тан олдик.
Танзила Норбоева, Сенат раиси
Изоҳ (0)