Hozirda Namangan viloyatida yuz yoshdan oshgan 46 nafar nuroniy istiqomat qilmoqda. Bu haqda “Daryo” muxbiri Azizbek Abduvaliyev xabar bermoqda.
Mingbuloq tumanining “Guliston” mahallasida Hadyaxon aya Hoshimova istiqomat qiladi. Onaxon 116 yoshda. U saylov berish jarayonlarida eng yoshi ulug‘ saylovchi sifatida ishtirok etdi.
Jurnalist Sanjarbek Hamidovning ma’lum qilishicha, qishloq markazidagi 34-umumta’lim maktabida joylashgan 226-saylov uchastkasi a’zolari “Guliston” mahalla fuqarolar yig‘ini “Do‘stlik” ko‘chasidagi 47-uyda istiqomat qiluvchi Hadyaxon ona Hoshimovaning huzuriga bordi. Momo ovoz berib, saylov byulletenlarini ko‘chma saylov qutisiga tashladi, yurtdagi tinchlik, to‘kinlikka shukronalik bildirib, duo qildi.
Hadyaxon ayaning kelini Sobiraxonning aytishicha, bu galgi saylovlarda momoning Umidjon, Nuriddin, Osiyo, Iroda, Aziza, Aqida, Xadicha kabi 72 nafardan ortiq farzand, nabira, chevara va evaralari ham faol qatnashdi. Ulardan 7 nafari saylovda ilk bor ovoz bergan.
Shuningdek, bugungi saylovlarda Mingbuloq tumani, “Bozorboshi” mahallasida yashovchi 110 yoshli Hafiza Mullaboyeva, “O‘rta qishloq”da istiqomat qiluvchi 105 yoshli Ibodat Toshtemirova, “Qirq chek” mahallasilik 101 yoshli Tojixon Turdaliyeva ham ovoz berdi.
Izoh (0)