The Diplomat халқаро интернет журнали муҳаррири Кети Пуц Twitter’даги саҳифасида Ўзбекистонда инсон ҳуқуқлари бўйича хорижий веб-ресурсларига кира олмаётгани ҳақида хабар ёзиб қолдирди.
Human Rights Watch ташкилотининг собиқ вакили Стив Свердлов эса унга жавобан Ўзбекистонда инсон ҳуқуқлари бўйича танқидий веб-ресурсларга (Марказий Осиёда Инсон ҳуқуқлари ассоциацияси, Инсон ҳуқуқлари учун халқаро шериклик, Ўзбек-Герман форуми, Норвегия Ҳелсинки қўмитаси) кириш имконияти чекланганини билдирган.
Президент Администрацияси ҳузуридаги Ахборот ва оммавий коммуникациялар агентлиги матбуот котиби Ҳикматилла Убайдуллаевнинг маълум қилишича, ушбу ҳолат юзасидан агентлик мутахассислари ўрганиш олиб борган ва юқорида тилга олинган веб-ресурсларга киришга чекловлар мавжуд эмаслиги аниқлаган.
«Ўзбекистонда хорижий янгиликлар сайтлари ҳамда инсон ҳуқуқлари бўйича веб-ресурсларга бўлган чекловлар аллақачон бартараф этилган. Ўзбекистоннинг ахборот сиёсати чеклов ва тақиқларга эмас, балки очиқликни таъминлашга қаратилганини яна бир бор эслатиб ўтмоқчиман», — деб таъкидлаган Ҳикматилла Убайдуллаев.
Орадан бироз вақт ўтиб, Human Rights Watch ташкилоти собиқ вакили Стив Свердлов юқоридаги сайтларни текшириб кўргани ва улар ишлаётганини маълум қилди. Шунингдек, Кети Пуц буни кўришдан мамнун эканини билдирди. У сайтларга эрталаб кириб бўлмагани, ҳозир эса бунинг уддасидан чиққанини ёзган.
Изоҳ (0)