Toshkent metropoliteni “Yunusobod” yo‘lining qurilishi davom etayotgan qismida 18-dekabr kuni yuz bergan yer o‘pirilishi bilan bog‘liq avariyaga O‘zbekiston Xalq demokratik partiyasi munosabat bildirdi. Unda kamida besh kishining o‘limiga sabab bo‘lgan voqea “aybdorlari qonun oldida javob berishi shart”ligi ta’kidlanadi.
Toshkent metrosining “Yunusobod” yo‘nalishi qurilishi vaqtida yer o‘pirilishi oqibatida ro‘y bergan fojia butun jamoatchilikni qattiq larzaga soldi. Xalq demokratik partiyasi, avvalo, ushbu fojia tufayli halok bo‘lgan hamyurtlarimizning oila a’zolari va yaqinlariga chuqur hamdardlik bildiradi.Ma’lumot uchun, metrodagi fojiadan so‘ng bosh vazir o‘rinbosari, transport vaziri Ochilboy Ramatov raisligida hukumat komissiyasi tuzilgan. Komissiya halok bo‘lgan ishchilarning oila a’zolariga yordam ko‘rsatish choralarini ko‘rmoqda. “Gazeta.uz”ning xabar berishicha, qurbonlarning yaqinlariga (ular 18-dekabrda kun bo‘yi voqea joyida bo‘lgan) pul kompensatsiyasi to‘lanadi va boshqa zaruriy yordam ko‘rsatiladi.Shuning bilan birga, hukumatdan, mutasaddi vazirlik va idoralar, qurilish va pudratchi tashkilotlar rahbarlaridan ishchi xodimlarning hayoti, qonuniy haq-huquqlarini muhofaza qilish bilan bog‘liq o‘ta dolzarb masalalarga katta mas’uliyat va chuqur javobgarlik hissi bilan yondashishni talab qiladi.
Bugun mamlakatimizning barcha hududlarida minglab qurilish loyihalari amalga oshirilmoqda. Achchiq haqiqatni tan olishimiz kerakki, ularning aksariyatida yuz minglab yurtdoshlarimiz, ayniqsa, yoshlar norasmiy yollanma ishchi sifatida haqsiz, huquqsiz mehnat qilmoqdalar.
Xalq demokratik partiyasi barcha qurilish va boshqa xavfli sharoitlarda ishlayotgan vatandoshlarimizning mehnat xavfsizligi to‘liq ta’minlanishini mutasaddi tashkilotlardan talab qiladi. Fojiaga sabab bo‘lgan holatlar tahlili bo‘yicha aybdorlar qonun oldida javob berishi shart.
Hammamiz kecha yuz bergan fojiadan saboq chiqarishimiz, ishchi xodimlarning hayoti, xavfsizligi, haq-huquqlarini qat’iy himoya qilishimiz zarur.
Xalq demokratik partiyasi Markaziy kengashi axborot xizmati
Izoh (0)