Тошкент метрополитени «Юнусобод» йўлининг қурилиши давом этаётган қисмида 18 декабрь куни юз берган ер ўпирилиши билан боғлиқ аварияга Ўзбекистон Халқ демократик партияси муносабат билдирди. Унда камида беш кишининг ўлимига сабаб бўлган воқеа «айбдорлари қонун олдида жавоб бериши шарт»лиги таъкидланади.
Тошкент метросининг «Юнусобод» йўналиши қурилиши вақтида ер ўпирилиши оқибатида рўй берган фожиа бутун жамоатчиликни қаттиқ ларзага солди. Халқ демократик партияси, аввало, ушбу фожиа туфайли ҳалок бўлган ҳамюртларимизнинг оила аъзолари ва яқинларига чуқур ҳамдардлик билдиради.Маълумот учун, метродаги фожиадан сўнг бош вазир ўринбосари, транспорт вазири Очилбой Раматов раислигида ҳукумат комиссияси тузилган. Комиссия ҳалок бўлган ишчиларнинг оила аъзоларига ёрдам кўрсатиш чораларини кўрмоқда. «Gazeta.uz»нинг хабар беришича, қурбонларнинг яқинларига (улар 18 декабрда кун бўйи воқеа жойида бўлган) пул компенсацияси тўланади ва бошқа зарурий ёрдам кўрсатилади.Шунинг билан бирга, ҳукуматдан, мутасадди вазирлик ва идоралар, қурилиш ва пудратчи ташкилотлар раҳбарларидан ишчи ходимларнинг ҳаёти, қонуний ҳақ-ҳуқуқларини муҳофаза қилиш билан боғлиқ ўта долзарб масалаларга катта масъулият ва чуқур жавобгарлик ҳисси билан ёндашишни талаб қилади.
Бугун мамлакатимизнинг барча ҳудудларида минглаб қурилиш лойиҳалари амалга оширилмоқда. Аччиқ ҳақиқатни тан олишимиз керакки, уларнинг аксариятида юз минглаб юртдошларимиз, айниқса, ёшлар норасмий ёлланма ишчи сифатида ҳақсиз, ҳуқуқсиз меҳнат қилмоқдалар.
Халқ демократик партияси барча қурилиш ва бошқа хавфли шароитларда ишлаётган ватандошларимизнинг меҳнат хавфсизлиги тўлиқ таъминланишини мутасадди ташкилотлардан талаб қилади. Фожиага сабаб бўлган ҳолатлар таҳлили бўйича айбдорлар қонун олдида жавоб бериши шарт.
Ҳаммамиз кеча юз берган фожиадан сабоқ чиқаришимиз, ишчи ходимларнинг ҳаёти, хавфсизлиги, ҳақ-ҳуқуқларини қатъий ҳимоя қилишимиз зарур.
Халқ демократик партияси Марказий кенгаши ахборот хизмати
Изоҳ (0)