4-dekabr, chorshanba kuni Andijon shahrining 2-kichik dahasida joylashgan ko‘p qavatli uylarning birida qo‘lbola usulda tayyorlangan gazni tortish moslamasida yuzaga kelgan chaqnash oqibatida portlash sodir bo‘lgani haqida xabar berilgan edi. Ushbu ayanchli hodisadan keyin joylarda targ‘ibot ishlari olib borilmoqda.
Xususan, Qo‘qon shahrida kommunal muammolarni bartaraf etish maqsadida tuzilgan ishchi guruh vakillari tomonidan o‘rganish o‘tkazildi.
Jumaladan, tabiiy gaz ta’minotini yaxshilash maqsadida o‘tkazilgan tadbirlar natijasida shaharning 1-Davronbek mahallasidagi Nafosat ko‘chasi, 25-Qipchoqariq mahallasidagi Naqshbandiy ko‘chasi, 30-Sadoqat mahallasidagi Ko‘rpabof ko‘chalarida yashovchi fuqarolar noqonuniy gaz tortish moslamalaridan foydalanayotgani aniqlandi.
65-Sunbula mahallasidagi Habibiy ko‘chasida esa hech qanday hujjatlarsiz gaz tarmog‘iga ulanib, noqonuniy gaz tortish moslamasidan foydalanayotgan novvoyxona ham aniqlandi. Yuqoridagi barcha holatlar bo‘yicha ma’muriy bayonnomalar tuzilib, jarimalar belgilandi, xonadonlar gaz tarmog‘idan uzildi.
Shu bilan bir qatorda shahardagi bozorlarda noqonuniy gaz tortish moslamalarini sotib, daromad orttirayotgan fuqarolarni aniqlash, moslamalar sotilishiga chek qo‘yish maqsadida ham qator tadbirlar tashkil etildi. Qo‘qon savdo kompleksida bozor ma’muriyati bilan hamkorlikda olib borilgan ishlar natijasida 100 dan ortiq noqonuniy moslamalar savdosiga chek qo‘yildi, deyiladi xabarda.
Izoh (0)