Ichki ishlar tizimida eng ko‘p intizomni buzish holatlariga yo‘l qo‘ygan xizmatlar ma’lum qilindi

Joriy yilning 4—5-dekabr kunlari Ichki ishlar vazirligi Kadrlar bosh boshqarmasi tashabbusi bilan ichki ishlar organlariga kadrlarni tanlash, ularning zaxirasini shakllantirish yo‘nalishida tarkibiy va hududiy organlar kadrlar bo‘linmalari rahbarlari ishtirokida tanqidiy ruhdagi yig‘ilish o‘tkazildi. Bu haqda Ichki ishlar vazirligi “Daryo”ga ma’lum qildi.

Shuningdek, hozirgi kunda xodimlar o‘rtasida xizmat intizomi va qonuniylikni mustahkamlash, o‘qitish, malakasini oshirish borasida qator ishlar amalga oshirilayotgani qayd etildi. Shu bilan birga, ayrim mutasaddi rahbarlarning ushbu masalaga o‘ta mas’uliyatsizlik bilan yondashib kelayotganligi, tizimda hamon nopok xodimlar tomonidan xizmat burchiga, qasamyodiga xoinlik qilinib, poraxo‘rlik, ta’magirlik, mansab vakolatini suiiste’mol qilish kabi xatti-harakatlar sodir etilishi davom etayotganligi tanqid qilindi.

Jumladan, joriy yilda eng ko‘p intizom buzish holatlari Yo‘l harakati xavfsizligi (820 ta), Patrul-post (508 ta) hamda Migratsiya va fuqarolikni rasmiylashtirish (127 ta) xizmatlari hissasiga to‘g‘ri kelgan. Shu munosabat bilan ushbu sohaviy xizmatlarning barcha shaxsiy tarkibini yil yakuniga qadar navbatdan tashqari attestatsiyadan o‘tkazish to‘g‘risida topshiriq berildi.

Bu borada Ichki ishlar vazirligi markaziy apparati, o‘quv muassasalari, Qoraqalpog‘iston Respublikasi Ichki ishlar vazirligi, Toshkent shahar va Toshkent viloyati ichki ishlar bosh boshqarmalari, viloyatlar ichki ishlar boshqarmalari kadrlar bilan ishlash xizmatlari rahbarlari yo‘l qo‘ygan kamchiliklari uchun qattiq ogohlantirilib, yil yakuniga qadar faoliyatida o‘zgarish qilmagan taqdirda ularning lavozimlarida qolish yoki qolmaslik masalalari ko‘rib chiqilishi haqida ogohlantirildi.

Shuningdek, poraxo‘rlik, ta’magirlik, mansab vakolatini suiiste’mol qilish kabi salbiy illatlarga moyilligi bor nopok xodimlarni barvaqt aniqlash va ularni tizimdan chetlashtirish choralarini ko‘rish yuzasidan mutasaddi rahbarlarga tegishli topshiriqlar berildi.