4 декабрь, чоршанба куни Андижон шаҳрининг 2-кичик даҳасида жойлашган кўп қаватли уйларнинг бирида қўлбола усулда тайёрланган газни тортиш мосламасида юзага келган чақнаш оқибатида портлаш содир бўлгани ҳақида хабар берилган эди. Ушбу аянчли ҳодисадан кейин жойларда тарғибот ишлари олиб борилмоқда.
Хусусан, Қўқон шаҳрида коммунал муаммоларни бартараф этиш мақсадида тузилган ишчи гуруҳ вакиллари томонидан ўрганиш ўтказилди.
Жумаладан, табиий газ таъминотини яхшилаш мақсадида ўтказилган тадбирлар натижасида шаҳарнинг 1-Давронбек маҳалласидаги Нафосат кўчаси, 25-Қипчоқариқ маҳалласидаги Нақшбандий кўчаси, 30-Садоқат маҳалласидаги Кўрпабоф кўчаларида яшовчи фуқаролар ноқонуний газ тортиш мосламаларидан фойдаланаётгани аниқланди.
65-Сунбула маҳалласидаги Ҳабибий кўчасида эса ҳеч қандай ҳужжатларсиз газ тармоғига уланиб, ноқонуний газ тортиш мосламасидан фойдаланаётган новвойхона ҳам аниқланди. Юқоридаги барча ҳолатлар бўйича маъмурий баённомалар тузилиб, жарималар белгиланди, хонадонлар газ тармоғидан узилди.
Шу билан бир қаторда шаҳардаги бозорларда ноқонуний газ тортиш мосламаларини сотиб, даромад орттираётган фуқароларни аниқлаш, мосламалар сотилишига чек қўйиш мақсадида ҳам қатор тадбирлар ташкил этилди. Қўқон савдо комплексида бозор маъмурияти билан ҳамкорликда олиб борилган ишлар натижасида 100 дан ортиқ ноқонуний мосламалар савдосига чек қўйилди, дейилади хабарда.
Изоҳ (0)